Зокиржон Алматов тарихий сирларни ошкор қилди

Биринчи бўлиш осон эмас. Таъбир жоиз бўлса, Зокиржон Алматович Алматов ҳам Ўзбекистон Ички ишлар соҳасида биринчи бўлди. У Ўзбекистон Республикаси Ички ишлар вазирлигини тузишда иштирок этган, мамлакатда жиноятчилик урчиган, халқ билан мулоқот қилиш қийин бўлиб қолган даврларда фаолият юритган вазир. 

Зокиржон Алматов 1991 йилдан 2006 йилгача 15 йил давомида Ўзбекистон Республикаси Ички ишлар вазири лавозимида фаолият юритганда, давлат бошидан қандай кунлар ўтмади дейсиз. Айниқса, уюшган жиноятчилик ва терроризм хавфи кучайган, ҳудудларда тинимсиз портлашлар кузатилган пайтларда Алматовнинг қатъий қарорлар қабул қилишдаги принциплари шаклланган. Унинг ҳам шахс, ҳам арбобликдаги сифатлари ўртага чиққан.  Ўша даврларда Ички ишлар вазирлиги тизгинни қўлига олиш учун қанчалик қаттиққўл сиёсат юритмасин, одамлар ишончини қозонган, ҳурмат топган. Алматов эса вазирлик тизимида, ходимлар орасида оилани шакллантира олган. 

Зокиржон Алматович 70 ёшни қаршилаш арафасида турибди. У 12 йил Ички ишлар вазирлиги тизимидан айри ҳаёт кечирди. Шавкат Мирзиёев Ўзбекистон Республикаси Президенти бўлгач, 2018 йилдан эътиборан Зокиржон Алматов Ички ишлар вазири маслаҳатчиси ўлароқ яна иш бошлади. 

Алматовни халқимиз, ёшлар, Ички ишлар органларидаги ходимлар ардоқлайди. Адолатли раҳбар, ишончли дўст, тўғри йўл кўрсата оладиган маслаҳатчи ва Ички ишлар ходимларини хафа қилдириб қўймайдиган инсон сифатида билади. 

Генерал-полковник Зокиржон Алматов ҳеч қачон ОАВга интервью бермаган. Ҳолбуки, айтилиши керак гаплар, очиқлаш вақти келган сирлар талайгина. Қолаверса, тарих билан юзлашиш вақти ҳам аллақачон келган. 

Зокиржон Алматов интервьюда қуйидагилар ҳақида очиқ-ойдин гапирди:

•    1989 йил Бўка воқеалари;
•    1990 йил Паркент воқеалари;
•    1991 йил Президент Каримовга очиқдан очиқ қаршиликлар, мухолифатнинг юзага келиши;
•    1992 йил “Ёшлик” талабалар шаҳарчасидаги намойиш;
•    1999 йил 16 февраль воқеалари;
•    2004 йил Чорсудаги мудҳиш тонг;
•    2005 йил бутун дунёни ларзага келтирган Андижон воқеалари.

Алматов лавозимдан кетгандан сўнг, мамлакатда Ички ишлар органлари ходимларининг обрўсига тушиб кетганмиди? Норасмий лидерлик собиқ Миллий хавфсизлик хизматига ўтганми? Алматовнинг “кўча” билан муносабатлари қандай? Салим Абдувалиев ва Ғафур Раҳимовнинг уюшган жиноятчиликка алоқаси бўлганми? Интервьюда Зокиржон Алматов ушбу саволларга ҳам жавоб берган. 

Зокиржон Алматович Алматов билан илк эксклюзив интервьюни бугун, 18 март куни соат 19:00 дан эътиборан QALAMPIR.UZ интернет нашрида, YouTube ва Mover’даги саҳифаларимизда томоша қилишингиз мумкин.