Бугун ўзбекистонлик дзюдочи Жаҳон чемпионатидаги иштирокини бошлайди

Айни кунларда Қатарда дзюдо бўйича Жаҳон чемпионати баҳслари ўтказилмоқда. Мусобақада Ўзбекистон жамоаси вакиллари ҳам совринли ўринлар учун курашмоқда. 

Мусобақанинг дастлабки кунидаёқ Ўзбекистон жамоаси медаллар қўлга киритишни бошлаб юборди. -60 кг вазн тоифасида Дилшодбек Баратов Жаҳон чемпионатининг кумуш медали соҳибига айланди. Турнирнинг иккинчи кунида аёллар ўртасидаги баҳсларда -52 кг вазн тоифасида курашган Диёра Келдиёрова ҳам кумуш медални қўлга киритди.

9 май кунги баҳсларда Ўзбекистон жамоасининг ҳисоби бронза медаль билан бойиди. -73 кг вазн тоифасида иштирок этган Муроджон Йўлдошев бронза медали учун баҳсда канадалик Артур Маргелидондан устун келиб, совриндорлар қаторидан жой олди.

Жаҳон чемпионатининг тўртинчи кунида 1 нафар Ўзбекистон вакили татамига чиқади. -81 кг вазн тоифасида Мусо Собиров совринли ўринлар учун кураш олиб боради. Унга дастлабки босқичда испаниялик Хосе Мендиола рақиблик қилади.

Маълумот учун, Қатарда ўтказилаётган мусобақа спортчилар учун Париж-2024 Олимпиадаси йўлида муҳим рейтинг очколарини тақдим этади. Баҳслар 13 майга қадар давом этади.