Будапешт ва Братислава Киевга дизель беришни тўхтатди

Венгрия ва Словакия Украинага дизель экспортини тўхтатди. Сабаб – Россия нефтини Европага етказувчи “Дружба” қувури орқали етказиб бериш узилиши. Будапешт Киевни нефть транзитини тикламасликда айбламоқда, Брюссель эса икки давлатнинг энергия хавфсизлиги хавф остида эмаслигини билдирган. Бу ҳақда “Euronews” хабар берди.

Жорий йил 27 январдан бери Россия нефти Венгрия ва Словакияга етиб бормайапти. ОАВларга кўра, қувур Украина ҳудудидаги Россия зарбаси оқибатида шикастланган. Венгрия Ташқи ишлар вазири Петер Сийярто Киев нефть оқимини тикламаганини “сиёсий қарор” деб атаган ва дизель экспорти нефть транзити қайта йўлга қўйилмагунча тикланмаслигини айтган.

Словакияда ҳам шунга ўхшаш чора кўрилган. Давлат назоратидаги “Slovnaft” нефть қайта ишлаш заводи дизель экспортни тўхтатиб, ички бозорни устувор деб эълон қилган. Ҳукумат фавқулодда захиралардан 250 минг тонна нефть ажратган.

Икки давлат Европа комиссиясидан РФ нефтини Хорватия портлари орқали транзит қилишга рухсат беришни сўраган. Загреб эса бу санкцияларга зид бўлиши мумкинлигини урғулаган. Еврокомиссия эса Венгрия ва Словакияда захиралар етарли эканини таъкидлаб, уларнинг энергия хавфсизлигига таҳдид йўқлигини билдирган.

Бу можаро Киев ва Россия нефтидан ҳали ҳам тўлиқ воз кечмаган айрим ЕИ давлатлари ўртасидаги зиддиятни яна бир бор очиқ намоён этган. Украина эса қиш фаслида инфратузилмага берилган зарбалар ортидан жиддий энергетик инқирозни бошдан кечирмоқда.

Эслатиб ўтамиз, аввалроқ Европа давлатлари Россиянинг “соя флоти” танкерларини мусодара қилиш имкониятини муҳокама қилаётгани ҳақида хабар берилганди.