“Бу табрик эмас”. Швейцария Президенти сайловдаги ғалабасидан кейин Путинга хат ёзди
Олам
−
22 Апрель 13579
Швейцария Президенти Виола Амхерд Россия раҳбари Владимир Путинга сайловдаги навбатдаги ғалабасидан сўнг мактуб йўллади. Бу ҳақда “Blick” нашри мамлакат Мудофаа вазирлиги вакили Лоренц Фришкнехтга таяниб хабар берди.
“Бу мактуб табрик эмас”, дейди Лоренц Фришкнехт нашрга.
Унинг сўзларига кўра, мактубда Россия Президентининг янги ваколат муддатини ҳисобга олган ҳолда бир нечта мавзулар кўриб чиқилади.
Шунингдек, хатда 22 март куни “Крокус Сити Ҳолл”да содир этилган теракт қурбонлари ҳамда Россия ҳудудларида сув тошқини оқибатида жабрланганларга ҳамдардлик билдирилган.
Лоренц Фришкнехт Амхерднинг мактубини “қийин пайтларда мулоқотга чақириқ” деб атаган.
Эслатиб ўтамиз, Россияда президентлик сайловлари 15-17 март кунлари бўлиб ўтди. Уларнинг натижаларига кўра, Владимир Путин 87,28 фоиз овоз билан ғалаба қозонди.
