Британияда Трамп шарафига зиёфат бўлиб ўтди

АҚШ Президенти Дональд Трампнинг Буюк Британияга давлат ташрифи доирасидаги биринчи тўлиқ куни Уиндзор қалъасида Қирол Чарльз III томонидан уюштирилган тантанали зиёфат билан якунланди. Бу ҳақда “The New York Post” хабар берди.

Трамп "Marine One" вертолётида дунёнинг энг қадимий ва энг катта тураржой қалъаси – Виндзорга қасрига етиб келди. У Буюк Британияга иккинчи бор давлат ташрифи билан бормоқда. Биринчи ташриф 2019 йилда бўлиб ўтган ва у пайтда уни қиролича Елизавета II қабул қилган эди. Бу сафар Трамп Чарльз III ва Қиролича Камилла билан учрашди, иккинчи кунда эса Британия ҳукумати аъзолари билан музокаралар режалаштирилган.

Трамп Виндзор саройини “мутлақо ўзига хос жой” деб атади ва Чарльз III’ни “кўп йиллик дўсти” сифатида таърифлади. У ва рафиқаси Виндзорда Қирол ва қиролича томонидан тантанали маросимда кутиб олинди. 1300 нафар армия, флот ва ҳаво кучлари хизматчилари Президентни шарафлаб саф тортди. Кейинчалик Трамп ва Мелания Елизавета II дафн этилган Авлиё Георгий черковига ташриф буюриб, гулчамбар қўйди.

Куннинг иккинчи ярмида Уиндзор осмонида F-35 қирувчи самолётлари ва Қироллик ҳаво кучларининг “Қизил ўқлар” гуруҳининг парвози бўлиб ўтди. Трамп бу манзарани Британия Бош вазири Кир Стармер билан бирга кузатди.

Асосий воқеа эса кечқурун Сент-Жорж залида ўтказилган тантанали зиёфат бўлди. Қирол Чарльз III нутқида Буюк Британия ва АҚШ ўртасидаги тарихий алоқаларни эслатар экан, ҳозирги кунда Европага яна тирания таҳдид солаётганини таъкидлади. 

“Бугун биз ва иттифоқчиларимиз Украинани қўллаб-қувватлаб, тажовузни жиловлаш ва тинчликка эришиш учун биргамиз”, деди Чарльз III.

Залда йиғилган 160 меҳмон АҚШ мадҳиясини тик туриб тинглади. Трамп эса фрак ва оқ галстук-бабочкада нутқ сўзлаб, Британия маданияти ва цивилизациясининг ютуқларини тилга олди. У ҳозирги сиёсий воқеаларга деярли тўхталмади, фақат “ўтган йили АҚШ жуда оғир аҳволда эди” деб эслатди. 

Эслатиб ўтамиз, Буюк Британия Қироли Чарльз III ва бошқа британиялик қироллик оила аъзолари кеча, 17 сентябрь куни Дональд Трампни кутиб олгани ҳақида хабар берилганди.