Британияда диабет билан касалланганлар сони кескин ошиб кетди

Буюк Британияда қандли диабет билан касалланганлар сони рекорд даражага етди. Бу ҳақдаги ҳисоб-китобларни “Diabetes” эълон қилди.

Қайд этилишича, Буюк Британияда яшаётган катта ёшлиларнинг ҳар бештадан бири қандли диабет ёки диабетдан олдинги касалликка чалинган.

Нашрга кўра, қандли диабет 4,6 миллион кишида аниқланган, бу ўтган йилга нисбатан 200 минг кишига кўпдир.

“Бундан ташқари, Буюк Британияда яна 1,3 миллион киши 2-тоифа диабетга чалинган, аммо ташхис қўйилмаган”, дейилади хабарда.

Буюк Британияда диабетнинг ўсиши бутун Европа ва дунёдаги тенденцияларни акс эттиради. “The Lancet” тиббиёт журналида эълон қилинган глобал ҳисоб-китобларга кўра, 2022 йилда 828 миллион киши қандли диабет билан касалланган, бу 1990 йилдагидан 630 миллионга кўп.

Маълумот учун, қандли диабет асосан икки шаклда бўлади: 1-тоифа ва 2-тоифа. 1-тоифа диабет – бу организмнинг иммунитет тизими инсулин ишлаб чиқарадиган ҳужайраларга ҳужум қиладиган касаллик ва 2-тоифа диабет – бу етарли миқдорда инсулин ишлаб чиқарилган, аммо организм ундан самарали фойдалана олмайдиган касаллик. Касалликларнинг тахминан 90 фоизи 2-тоифа диабетга тегишли. Қандли диабет соғлиқ учун жиддий оқибатларга олиб келиши мумкин, жумладан юрак хуружи, инсульт, буйрак муаммолари, кўз муаммолари, оёқ муаммолари ва асаб муаммолари.

Эслатиб ўтамиз, аввалроқ Буюк Британия ортиқча вазнли беморларнинг иш жойига қайтишига ёрдам берадиган вазн йўқотувчи дорини синовдан ўтказишга тайёрланаётгани ҳақида хабар берилганди.