Британияда бемор операция пайтида мусиқа чалди (видео)

Буюк Британиянинг Кроуборо шаҳрида яшовчи 65 ёшли Дениз Бэкон операция вақтида кларнет чалди. Ушбу жараёнда шифокорлар унинг бош миясига электр импульслари таъсирини кузатишлари мумкин бўлган. Бу ҳақда “Daily Mail” хабар берди.

Қайд этилишича, Бэкон нафақадаги нутқ ва тил терапевти бўлиб, ҳаракатнинг секинлашиши ва мушак қотишлари каби симптомлар туфайли чуқур мия стимуляцияси (DBS) амалиётидан ўтган. Паркинсон касаллигига 2014 йилда чалинган беморнинг юриш, сувда сузиш, рақсга тушиш ва кларнет чалиш қобилияти пасайган. Тўрт соатлик операция давомида у уйқусиз бўлган. Унинг фақат боши ва терисининг сезгирлиги анестезия ёрдамида йўқотилган. Операция мияга электродларни имплантация қилиш орқали ўтказилган. Электродлар жойлаштирилгандан сўнг Бэконнинг бармоқ ҳаракати дарҳол яхшиланган ва кларнетни осонлик билан чала бошлаган. 

Нейрожарроҳ профессор Кейомарс Ашканнинг айтишича, электродлар жойлаштирилгандан сўнг Денизнинг қўл ҳаракатлари дарҳол яхшиланган ва қўлида ҳам шу каби натижа кузатилган. У операцияга мусиқа чалиш қобилиятини синаш учун ўз кларнетини олиб келган.

“Ҳаракатларим дарҳол енгиллашди ва бу кларнетни чалиш қобилиятимни яхшилади. Юриш ҳам осонлашди, сувга қайтиш ва рақсга тушиш қобилиятимни синашни кутяпман”, дейди бемор. 

Бэкон операция учун қувватланадиган импульс генераторини танлаган. У беморнинг кўкрагига ўрнатилади ва 20 йилгача ишлайди. Қурилма мия фаолиятини назорат қилади ва зарур бўлганда автоматик равишда стимуляцияни бошқаради.

Профессор Ашкан чуқур мия стимуляцияси Паркинсон касаллиги билан боғлиқ ҳаракат симптомларини назорат қилишда энг самарали усуллардан бири эканини айтган ва замонавий DBS технологиялари ҳар бир бемор учун терапияни персоналлаштириш имконини бериб, ҳаёт сифатига ижобий таъсир кўрсатишини таъкидлаган.

Моҳичеҳра Қадамова