Британия Фарҳод Аҳмедовни санкциялар рўйхатидан чиқарди

Буюк Британия асли келиб чиқиши озарбайжон бўлган россиялик миллиардер ва тадбиркор Фарҳод Аҳмедовни санкциялар рўйхатидан чиқарди. Бу ҳақда Британиянинг Молиявий санкцияларни амалга ошириш бошқармаси (OFSI) хабар берди.

Аҳмедов 2022 йил апрелидан буён Британия санкциялари остида бўлиб, унинг активлари музлатилган эди. Тадбиркорнинг адвокати Уильям Жуле РБК нашрига берган изоҳида Лондонда чекловлар бекор қилингани Аҳмедовнинг Британия санкция қонунчилигига мувофиқ қайта кўриб чиқиш бўйича ариза берганидан сўнг амалга ошганини тасдиқлаган.

“Оддий қилиб айтганда, 2018 йилги санкциялар ва пул ювишга қарши кураш тўғрисидаги қонуннинг 23 (1) (б) моддаси санкцияга учраган шахсларга ҳукуматдан ўз қарорини қайта кўриб чиқишни сўраш имкониятини беради. Ушбу механизм суд жараёнидан ўтмасдан далиллар ва асосларни тақдим этиш имкониятини яратади”, деди адвокат.

Унинг сўзларига кўра, Аҳмедов Британия ҳукуматининг бу қарорини мамнуният билан қабул қилган. Адвокатнинг таъкидлашича, бу натижа санкциялар жорий этилишининг ҳуқуқий жиҳатдан тўғри назорат қилинишининг муҳимлигини кўрсатади.

Қайд этиш жоиз, 2024 йил май ойида Европа Иттифоқи суди ҳам Аҳмедовга нисбатан санкцияларни бекор қилган. У 2022 йил апрелида Европа санкцияларига тушган, бироқ 2023 йил кузида Брюссель уни рўйхатдан чиқарган. Суд қарорида Аҳмедовнинг Россия ва Озарбайжон фуқароси экани айтилган бўлса-да, адвокат Уильям Жуле унинг Озарбайжон фуқароси эмаслигини таъкидлаган.

Суд маълумотига кўра, Брюссель Аҳмедов Transley Trading компаниясига асос солиб, уни Россия газ ишлаб чиқарувчиларига ускуналар етказиб бериш учун ишлатганини ва “Нортгаз” ҳамда “Bechtel Energy” компанияларидаги иштироки туфайли санкциялар рўйхатига тушганини билдирган.

Лекин тадбиркор Transley Trading 1999 йилдан бери мавжуд эмаслигини, “Нортгаз”даги акцияларини 2012 йилда сотганини, “Bechtel  Energy” компаниясининг бошқарув раиси бўлмаганини ва ҳеч қандай лавозим эгалламаганини таъкидлаган. 

Шу боис, 2023 йил 15 сентябрь куни Аҳмедовнинг исми санкциялар рўйхатидан чиқарилиб, суд унинг жазоланиши асоссиз бўлганини тан олган.

Маълумот ўрнида, Фарҳод Аҳмедов газ қазиб чиқарувчи “Нортгаз” компаниясининг собиқ эгаси бўлиб, 2004-2007 йилларда Россия Федерация Кенгашида Краснодар ўлкаси сенатори сифатида ишлаган.

2005 йилда “Нортгаз”нинг юридик манзили Краснодарга кўчирилган ва компания минтақа бюджетига солиқ тўлашни бошлаган.

Аҳмедов, шунингдек, “Красная Поляна” курортининг ривожланишига сармоя киритган. У Сочи-2014 Олимпиадаси олдидан “Горки Город” ва “Горная Карусель” чанғи курортларини қуришни бошлаган, 2004-2006 йилларда уларни ривожлантиришга 16 миллиард рубль ажратишни режалаштирган.

2006 йилда эса бу лойиҳани Магомед Билаловга сотган. Билалов – Шимолий Кавказ курортлари компанияси бошқарув кенгаши раисининг укаси ва Россия Олимпия қўмитаси вице-президенти эди.

Эслатиб ўтамиз, аввалроқ Европа Иттифоқи россиялик тадбиркор ва миллиардер Алишер Усмоновнинг синглиси Гулбаҳор Исмоиловани санкциялар рўйхатидан чиқарган эди. Шунингдек, тадбиркор, Европа Яҳудий Конгрессининг собиқ раҳбари Вячеслав Моше Кантор, Россия Федерацияси Спорт вазири Михаил Дегтярёв ҳам ЕИ санкциялари рўйхатидан чиқарилган.