Британия ҳам АҚШнинг Украинага кассетали ўқ-дорилар юборишига қарши 

Буюк Британия кассетали ўқлардан фойдаланишга қарши. Бу ҳақда бугун, 8 июль куни Буюк Британия Бош вазири Риши Сунак “Sky News” телеканалига берган интервьюсида АҚШнинг Украинага кассетали ўқ-дорилар етказиб бериш ҳақидаги қарорини изоҳлаётганида сўз очди. 

"Буюк Британия кассетали ўқ-дориларни ишлаб чиқариш ёки улардан фойдаланишни тақиқловчи конвенцияни имзолаган ва биз улардан фойдаланишни тавсия этмаймиз", деган Риши Сунак.

Шу билан бирга Буюк Британия ҳукумати раҳбари Лондон Киевни қўллаб-қувватлашда давом этишига ишонтирган ва бошқа мамлакатларни ҳам шундай қилишга чақирган. Унинг қўшимча қилишича, Украинага ҳарбий ёрдамни ошириш йўллари келаси ҳафта НАТОнинг Вильнюсдаги саммитида муҳокама қилинади.

Маълумот ўрнида, кассетали ўқ-дорилар турли мақсадлар учун (танкга, пиёдаларга ва бошқаларга қарши) кўп миқдорда портловчи ўқ-дорилар билан юкланган зарядлар бўлиб, улар бомбалар, артиллерия снарядлари ва ракета каллаклари кўринишида кўплаб мамлакатлар армияларида ишлатилади. 2010 йил 1 августда кассетали ўқ-дорилар тўғрисидаги конвенция кучга кирган, уни 123 давлат имзолаган, шулардан 110 таси ратификация қилган. Мазкур конвенция билан давлатлар ҳеч қачон, ҳеч қандай шароитда бундай ўқ-дориларни ишлаб чиқармаслик, фойдаланмаслик ва ҳеч кимга бермасликка ваъда берган. 

Эслатиб ўтамиз, жорий йилнинг 7 июль куни АҚШ миллий хавфсизлик бўйича маслаҳатчиси Жейк Салливан Қўшма Штатлар Украинага кассетали ўқ-дориларни ўтказишга қарор қилганини маълум қилганди. Шунингдек, у Киев Вашингтонга тинч аҳолига минимал таҳдид билан Америка кассетали ўқ-дориларини қўллаш бўйича ёзма кафолатлар берганини таъкидлади. Бироқ Human Rights Watch инсон ҳуқуқлари ташкилоти ва Бирлашган Миллатлар Ташкилоти АҚШнинг бу қарорига қарши чиқди.