Бош вазир зилзила содир бўлган ҳудудларга бориб кўрди

Япония Бош вазири Санаэ Такаичи кучли зилзиладан жабрланган Кумамото префектурасига ташриф буюрди. Ҳукумат тикланиш ишларини давом эттираётган бир пайтда, юқори ҳарорат ва сув танқислиги қутқарув ҳамда тиклаш ишларини мураккаблаштирмоқда. Бу ҳақда “The Guardian” хабар берди.

Такаичи ҳарбий вертолёт орқали зарар кўрган ҳудудларни кўздан кечирган ва яхши жиҳозланган эвакуация марказларидан бирига ташриф буюрган. Бироқ, ижтимоий тармоқларда айрим фойдаланувчилар бу ташриф воқеий шароитни тўлиқ акс эттирмаганини танқид қилган. Кумамото губернатори Такаши Кимура Бош вазир билан учрашувда сўнгги кунлардаги “ғайриоддий иссиқ”ни таъкидлаб, эвакуация марказларида тоза сув ва тиббий хизматни яхшилаш учун қўшимча давлат ёрдамини сўраган.

Шу билан бирга, зилзила вақтида қулаб тушган Aeon савдо марказида фаолият юритган Habita компанияси раҳбарияти икки ходимини кунлик тушумни сейфга жойлаштириш учун бино ичига қайтишга кўрсатма берганини тан олган. Кейинроқ содир бўлган портлаш оқибатида ҳар 2 ходим ҳалок бўлган.

Компания раҳбарлари қурбонлардан бири – 22 ёшли Куруми Отакенинг оиласидан узр сўраган. Савдо маркази маъмуриятининг маълум қилишича, портлаш газ сизиб чиқиши сабабли юз берган. Зилзиладан кейин қарийб 3 минг нафар харидор эвакуация қилинган бўлса-да, айрим ходимлар бино ичида қолган. Қутқарувчилар 5 нафар тирик инсонни қутқарган, яна 7 кишининг жасадини топган.

Маълумот учун, қуввати 7,1 магнитудали зилзила содир бўлганига қарийб бир ҳафта бўлди. Қайд этилишича, табиий офат оқибатида 38 киши ҳалок бўлган, улардан бири иссиқ ҳавода машина ичида бошпана қилган вақтда иссиқ уриши оқибатида вафот этган. 

Ҳозирда маҳаллий аҳоли вайроналар, синган жиҳозлар ва маиший техникаларни йиғиш ишларини давом эттирмоқда. Уки ва Хикава шаҳарларида вақтинчалик турар жойлар қурилиши бошланган, айрим меҳмонхоналар эса эвакуация қилинган аҳоли учун хоналарини тақдим этмоқда.

Маълумотларга кўра, ҳудудда 46 мингдан ортиқ хонадон ҳали ҳам ичимлик сувисиз қолмоқда, ёқилғи танқислиги ҳам сақланиб турибди. Мамлакат жанубида ҳаво ҳарорати 40 даражагача кўтарилгани иссиқ билан боғлиқ касалликлар хавфини кучайтиряпти.

8,5 мингдан ортиқ киши ҳануз мактаб спорт заллари, жамоат бинолари ва бошқа вақтинчалик эвакуация марказларида яшамоқда. Уларнинг кўпчилигида кондиционер йўқ, айрим одамлар эса автомобилларда ёки уйлари ташқарисида тунашга мажбур бўлмоқда.

Эслатиб ўтамиз, аввалроқ мазкур зилзила оқибатида камида 13 киши ҳалок бўлгани хабар қилинганди.