БМТ молиявий қийинчилик туфайли катта ислоҳот тайёрламоқда

north_east

БМТ қўрқоқми? Нега у урушларни тўхтата олмаяпти?

Бирлашган Миллатлар Ташкилоти тубдан қайта қуриш, асосий бўлинмаларни бирлаштириш ва ресурсларни қайта тақсимлаш масалаларини кўриб чиқмоқда. Бу ҳақда БМТ Бош котиби Антониу Гутерриш ишчи гуруҳи томонидан тайёрланган олти саҳифалик махфий меморандумга таяниб, “Reuters” хабар берди.

Ҳужжатда ўнлаб идораларни тўртта асосий йўналишда бирлаштириш таклиф этилади: тинчлик ва хавфсизлик, гуманитар масалалар, барқарор ривожланиш ва инсон ҳуқуқлари. Аниқ чора-тадбирлар Жаҳон озиқ-овқат дастури (WFP), UNICEF, ЖССТ ва БМТнинг Қочқинлар бўйича олий комиссарлигининг операцион тузилмаларини ягона гуманитар ташкилотга бирлаштиришни ўз ичига олади.

Ислоҳот, шунингдек, такрорланадиган функцияларни қисқартиришни ва ходимларни соддалаштиришни, жумладан, айрим ходимларни Женева ва Нью-Йоркдан арзон шаҳарларга кўчиришни ҳам ўз ичига олади.

Ташаббус БМТнинг молиявий инқирози билан боғлиқ: ташкилотнинг асосий донори бўлган Қўшма Штатлар мунтазам бюджетдан 1,5 миллиард доллар ва тинчликни сақлаш амалиётлари учун 1,2 миллиард доллар қарздор.

АҚШ ёрдамининг қисқариши аллақачон Гуманитар масалалар бошқармаси ходимларининг 20 фоизини ишдан бўшатишга олиб келди ва Халқаро Миграция Ташкилотида 6000 иш ўринларини қисқартириш билан таҳдид қилди.

Гутерриш ислоҳотларни “парчаланган тузилмалар ва бюрократия”га жавоб деб атади, бироқ БМТнинг юзлаб ходимлари 1 май куни Женевада қисқартиришларга қарши намойишга чиқди. Якуний қайта қуриш бўйича таклифлар 16 майгача қабул қилинади.

4 февраль куни АҚШ президенти Дональд Трамп Қўшма Штатларни БМТ Инсон ҳуқуқлари кенгаши ва БМТнинг Яқин Шарқдаги Фаластинлик қочқинларга ёрдам ва ишлар агентлиги таркибидан чиқиши ҳақидаги фармонни имзолади. У БМТ фаолиятини танқид қилиб, ушбу тузилма “катта салоҳиятга эга” бўла туриб, лекин узоқ вақт давомида буни амалга оширмаётганини айтди. Бундан ташқари, Америка етакчисининг фикрича, БМТ “жуда яхши бошқарилмайди”.