БМТ Бош котиби Исроилнинг Эронга ҳужумига муносабат билдирди

БМТ Бош котиби Антониу Гутерриш Исроилнинг Эрон ядровий объектларига берган зарбаларидан хавотир билдириб, томонларни босиқликка чақирди. Бу ҳақда БМТ раҳбарининг расмий вакили Фарҳан Ҳақ баёнот берди.

“Бош котиб Яқин Шарқда ҳар қандай ҳарбий эскалацияни қоралайди. Айниқса, Исроил томонидан Эрондаги ядровий объектларга ҳужумлар уюштирилгани жиддий хавотир уйғотмоқда – айнан шундай даврда Эрон ва АҚШ ўртасида Эрон ядровий дастурининг мақоми юзасидан музокаралар олиб борилмоқда”, дейилади баёнотда.

Гутерриш ҳар икки томоннинг максимал даражада босиқлик кўрсатишини ва “ҳар қандай ҳолатда ҳам можаронинг кучайишига йўл қўймасликни” сўраган. Шунингдек, у БМТ аъзо давлатлари Хавфсизлик Кенгаши низоми ва халқаро ҳуқуқ меъёрларига мувофиқ ҳаракат қилиши лозимлигини эслатган.

Эслатиб ўтамиз, аввалроқ Исроил Эроннинг “ядровий дастурига қарши” профилактик зарба берганини эълон қилган эди. Исроил Бош вазири Биньямин Нетаньяхунинг айтишича, операциянинг мақсади “Эрон ядровий инфратузилмасига, баллистик ракета ишлаб чиқарувчи заводларига ва ҳарбий салоҳиятига зарар етказиш” бўлган.

Ҳужум оқибатида Эрон ислом инқилоби қўриқчилари корпуси қўмондони генерал-майор Ҳусайн Саламий ҳалок бўлди. IRNA ва “Tasnim” ахборот агентликлари хабарига кўра, шунингдек, Эрон Атом энергияси ташкилотининг собиқ раҳбари Ферейдун Аббосий ва Исломий Озод университети президенти Муҳаммад Меҳди Теҳрончий ҳам вафот этган.

Эроннинг давлат IRIB телеканали ҳам Натанздаги ядровий дастур учун муҳим бўлган объектларда бир нечта портлашлар содир бўлганини хабар қилди.

Эрон ҳукумати эса Исроил томонидан ўз ҳудудига уюштирилган, тинч аҳоли, жумладан, олимлар ва ҳарбийлар ҳалок бўлган зарбаларига қаттиқ жавоб беришини маълум қилди.

Ўзбекистоннинг Эрон ва Исроилдаги элчихоналари ушбу мамлакатлардаги фуқароларга огоҳлантириш билан чиқиб, қатъий эҳтиёт чораларини кўришга чақирди. Шунингдек, Ўзбекистон Ташқи ишлар вазирлиги ҳам фуқароларга тегишли мурожаат билан чиқди.