Бир суткада Россиядаги 16 та муҳим нишонга зарба бердик – Зеленский

Украина ҳарбийлари сўнгги бир сутка ичида Россия ҳудудидаги 16 та муҳим нишонга зарба берди. Бу ҳақда Украина Президенти Владимир Зеленский Facebook’даги саҳифасида ёзиб қолдирди.

Зеленскийнинг айтишича, зарбалар Россиянинг урушни молиялаштираётган нефть объектлари, аэродромлар, ракета бўлинмаси ва Украинага ҳужумлар уюштиришда мунтазам фойдаланиладиган инфратузилмага қаратилган.

“Узоқ масофали зарбалар нефть объектларига – урушни молиялаштираётган Россиянинг нефть даромадларига берилди. Шунингдек, аэродромлар, ракета бўлинмаси ва Украинага ҳужум қилишда доимий фойдаланиладиган инфратузилма нишонга олинди. Ҳарбий корхона ва Россия логистикаси ҳам зарбаларга учради”, деган Зеленский.

Унинг таъкидлашича, уруш “келиб чиққан жойига қайтиши” керак.

“Биз Россиянинг тажовузкорлик қобилиятини адолатли равишда камайтирмоқдамиз. Мен барча иштирок этган жангчиларга аниқликлари учун миннатдорлик билдираман”, дея қўшимча қилган у.

Эслатиб ўтамиз, бугун, 26 август тонгида Россиянинг Тамбов вилоятидаги Котовск шаҳрида Wildberries логистика маркази Украина дронлари ҳужуми оқибатида ёниб кетган эди.