Бир кун келиб “Олтин тўп”ни қўлга киритишимга ишонаман – Рафинья

“Барселона” ва Бразилия терма жамоаси футболчиси Рафинья фаолиятидаги амбициялари ҳақида гапирар экан, келажакда “Олтин тўп”ни қўлга киритишига ишонишини айтди. Бу ҳақда “Footboom” нашри хабар берди.

“Ўйлайманки, келажакда “Олтин тўп”ни қўлга киритиш учун менда реал имконият бор ва мен бунга ишонаман. Футбол даврларга бўлинади. Бу катта мақсадларга эришиш учун ҳали олдимда кўп йиллар бор. Бу йилги маросимда бешинчи ўринни олганим ҳақида тўхталадиган бўлсам, бу мен учун оғир юк эмас, аксинча, олов учун ёқилғи. Мен нимага қодир эканлигимни яхши биламан”,  дейди Рафинья.

У шунингдек, футболдаги шахсий мукофотлар жамоавий муваффақиятлар билан чамбарчас боғлиқлигини таъкидлади:

“Олтин тўп”, албатта, шахсий шон-шуҳрат билан боғлиқ, лекин футбол бу жамоавий ўйин. “Барселона” ва Бразилия терма жамоаси билан ғалабаларимни эслар эканман, муваффақиятсизликлар ҳақида ўйлашга ҳожат йўқлигини ҳис қиламан. Мен чин дилдан миннатдорман. Бу мени янада кўпроқ ишлашга ундайди”, дея қўшимча қилади Рафинья.

Маълумот учун, Рафинья ўтган мавсум “Барселона” билан Испания чемпионлигини ва мамлакат кубогини қўлга киритган, шунингдек, Чемпионлар лигасида ярим финалга қадар етиб борган эди. Шу сабабли бразилиялик вингер “Олтин тўп” соврини учун асосий номзодлардан бири сифатида кўрилган, бироқ якунда 5-ўринни эгаллаган.

Жорий мавсумда 28 ёшли футболчи “Барселона” сафида барча турнирларда 7 та ўйинда майдонга тушиб, 3 та гол урди ва 2 та голли узатмани амалга оширди.

Эслатиб ўтамиз, жорий йилнинг 22 сентябрь куни Париж шаҳрида “France Football” нашрининг 2025 йилги “Олтин тўп” тақдирлаш маросимида Усмон Дембеле маросимнинг бош мукофотини қўлга киритган эди.