Бербок Трампнинг Россияни G7’га қайтариш ғоясини рад этди

Россия иқтисодий жиҳатдан ривожланган етакчи демократиялар гуруҳи – “Катта еттилик” (G7) таркибига киритилмаслиги керак. Бу ҳақда кеча, 14 февраль куни Германия Ташқи ишлар вазири Анналена Бербок Мюнхен хавфсизлик конференциясида маълум қилди.

Ушбу гуруҳ таркибига АҚШ, Германия, Буюк Британия, Франция, Италия, Канада ва Япония киради.

“G7 ҳамкорлари сифатида биз сўнгги уч йил ичида амалга оширилган шафқатсиз кенг кўламли босқин давомида бир неча бор аниқ қилиб айтдик: ҳозирги Россия – Путиннинг Россияси билан оддий ҳамкорлик бўлиши мумкин эмас”, деди у.

Бербокнинг эслатишича, Россия 2014 йилда Қримнинг аннексия қилиниши ортидан G7 (ўшанда G8) таркибидан чиқарилган, орадан 8 йил ўтиб эса Путин Украина устига бутун кучи билан бостириб келган. Унинг фикрича, ҳозирги “сунъий тинчлик” Россиянинг бутун Европа хавфсизлигига таҳдид солувчи янада катта тажовузига олиб келиши мумкин. Шу сабабли, АҚШ Президенти Дональд Трампнинг Россияни G7’га аъзолик масаласини фақатгина Россия ҳақиқатан ҳам тинчлик йўлига қайтиб, “тажовуз сиёсати”ни ўзгартиргандагина кўриб чиқиш мумкин. 

“Шундагина, албатта, биз турли соҳаларда ҳамкорликни тиклашимиз мумкин бўлади”, деди Бербок.

Бунга жавобан Трамп Россиянинг “Катта еттилик” таркибига қайтарилиши тарафдори эканини айтиб, унинг чиқарилиши хато бўлганини таъкидлаган. Унга кўра, бу масала Россияга бўлган симпатия ёки антипатияга боғлиқ эмас, балки G8'нинг дастлабки тузилишига асосланади. Трампнинг сўзларига кўра, Путин ҳам қайта қабул қилинишни истайди.

Кремль матбуот котиби Дмитрий Песков эса Россия G7 таркибига қайтишдан кўра, “Катта йигирмалик” (G20) доирасидаги фаолиятни муҳимроқ деб билишини билдирган. У G7'нинг долзарблиги сезиларли даражада камайганини, дунёдаги ўсиш марказлари бошқа минтақаларга кўчганини таъкидлаб, “Катта йигирмалик” глобал иқтисодий локомотивни аниқроқ акс эттиришини қайд этган.

Эслатиб ўтамиз, аввалроқ АҚШ Президенти Дональд Трамп Оқ уйда АҚШнинг янги жавоб тарифлари ҳақида гапирганда Россиянинг G7 таркибига қайтишини исташини ва Москванинг четлатилгани хато бўлганини айтганди.