Байден Украина Россияни енгишини имконсиз қилди – Трамп

АҚШ Президенти Дональд Трамп ўзидан олдинги президент Жо Байденни Украинанинг Россияга қарши урушда “ғалаба қозониш имконияти” йўқлигида айблади, чунки Байден Киевга интервенция қилувчи давлатга ҳужум қилишга рухсат бермади. Бу ҳақда у кеча, 21 август куни Truth Social ижтимоий тармоғида ёзди.

“Босқинчи мамлакатга ҳужум қилмасдан урушда ғалаба қозониш жуда қийин, ҳатто имконсиздир. Гўё фантастик ҳимояга эга бўлган ажойиб спорт жамоасига ҳужумга ўтишга рухсат берилмагандек. Ғалаба қозониш имконияти йўқ! Украина ва Россия билан ҳам худди шундай. Инсофсиз ва ўта қобилиятсиз Жо Байден Украинага қарши курашишга рухсат бермади, фақат ўзини ҳимоя қилишга рухсат берди”, деди Трамп.

Агрессив ҳарбий ҳаракатлар курсини спорт жамоалари тактикаси билан солиштиргандан сўнг, Америка раҳбари “бунинг оқибати нима бўлди?” деган саволни ўртага ташлаган. Трамп жавоб бермай, агар у Президент бўлганида бу уруш “ҳеч қачон бўлмасди” деган иборани такрорлади.

“Қизиқ даврлар ҳали олдинда”, дея постини якунлаган Дональд Трамп.

Қайд этиш жоиз, 2024 йил 25 ноябрда, Жо Байден АҚШ президенти бўлганида, Оқ уй биринчи марта Украинанинг АҚШ томонидан етказиб берилган узоқ масофали ATACMS баллистик-тактик ракеталаридан фойдаланиш бўйича чекловларни юмшатганини очиқ тан олди.

“Энди улар (Украина томони) фавқулодда вазиятларда ўзини ҳимоя қилиш учун ATACMS'дан фойдаланиши мумкин. Ва ҳозир – аниқ сабабларга кўра – бу Курск вилоятининг Курск туманида содир бўлмоқда”, деганди Оқ уй Миллий хавфсизлик кенгашининг ўша пайтдаги стратегик алоқалар бўйича координатори Жон Кирби.

Бунгача АҚШ Киевга Россия ҳудудига зарба бериш учун улар тақдим этган ракеталардан фойдаланишни тақиқлаган эди.

Ўз навбатида, Дональд Трамп 2025 йилнинг январ ойи охирида ҳокимият тепасига келганидан сўнг, Байден даврида бўлгани каби Украинага қурол-яроғларни текинга бериш ўрнига сотишни бошлади. Шу билан бирга, Трамп даврида Украина оладиган ракеталар ёки бошқа турдаги ҳужумкор қуроллар сони кўпаймаган.

Украина Қуролли кучлари бош қўмондони Александр Сирский жорий йил 23 июль куни чоп этилган “The Washington Post” газетасига берган интервьюсига АҚШ ва Европа давлатларидан Киевга Россия ҳарбий объектларига узоқ масофадан зарбалар беришни тақиқламасдан, кўпроқ ҳаво ҳужумидан мудофаа тизимлари ва турли ракеталарни юборилиши кераклигини айтган.

Сирскийнинг сўзларига кўра, ўрта ва узоқ масофага мўлжалланган ракеталарни қўллаш бўйича чекловларсиз қўшимча етказиб бериш, жумладан, Американинг  ATACMS ва Германиянинг TAURUS тизимлари Киевга Россия Федерациясида ракеталар ва учувчисиз самолётлар ишлаб чиқарувчи инфратузилмага зарба бериш орқали Россия қуроллари ишлаб чиқаришни секинлаштириш имконини беради.

Украина Қуролли кучлари бош қўмондони Украинада захирада қолган ATACMS ракеталари бор-йўқлиги ҳақида изоҳ беришдан бош тортди, “The Washington Post” нашрининг ёзишича, улар тугаши мумкин. Бундан ташқари, Сирскийнинг айтишича, Украинада 155 миллиметрли артиллерия снарядлари ва зирҳли транспорт воситалари етишмайди.