Байден Конгрессдан Украина учун яна 24 млрд доллар сўради 

АҚШ Президенти Жо Байден яширинча Конгрессдан Украинага ёрдам бериш ва аввалроқ Киевга берилган Америка қуроллари захираларини тўлдириш учун қўшимча 24 миллиард доллар ажратишни сўради. Бу ҳақда ўзи танишган ҳужжатларга таяниб, “Politico” хабар берди. 

Нашрнинг икки манбаси Байденнинг сўровини тасдиқлаб, унинг 25 ноябрь куни юборилганига аниқлик киритди. 

“Мурожаат 20 декабргача кўриб чиқилиши керак, чунки Оқ уйнинг бошқарув ва бюджет бўлими Конгрессга ушбу ёрдамни ёпилишнинг олдини олиш учун ҳукумат молиялаштиришни узайтириш қарорига киритишни таклиф қилган”, дейилади хабарда.

Тахминларга кўра, эълон қилинган маблағнинг 16 миллиард доллари Америка захираларини тўлдиришга, қолган 8 миллиард доллар эса Украинага хавфсизлик бўйича ёрдам бериш ташаббуси (USAI) доирасида сарфланади. Бу дастур Пентагоннинг армия омборларидан тўғридан тўғри жиҳозлар ва бошқа ёрдамларни етказиб бериш ўрнига, Украина армиясига қурол етказиб бериш бўйича ишлаб чиқарувчилар билан шартномалар тузишни назарда тутади.

Шу билан бирга, Байденнинг илтимоси “Конгресс Киевга тинчлик музокаралари эҳтимолини янада жиддий равишда саботаж қилишга имкон берадиган совғалар бермаслиги керак” деб ҳисоблайдиган баъзи республикачиларнинг норозилигига сабаб бўлган.

Бир кун олдин Давлат департаменти раҳбари Энтони Блинкен Қўшма Штатлар Украинани “2025 йилгача курашиши” ва тинчлик музокараларини куч позициясидан бошлаши учун барча зарур нарсалар билан таъминлашини айтди.

Аввалроқ у Оқ уй Украинага Конгресс томонидан тасдиқланган “ҳар бир доллар” маблағни 20 январга қадар, яъни сайланган президент Дональд Трамп лавозимига киришгунга қадар тақдим этиш ниятида эканини айтган эди.

Кейинроқ Пентагон аниқлик киритишича, аввалроқ ушбу мақсадлар учун ажратилган 9 миллиард доллардан фойдаланиш учун қурол-яроғ жўнатмалари ҳар ҳафта ўтказилиши режалаштирилган.

Эслатиб ўтамиз, Вашингтон Киевга 275 миллион долларлик сўнгги ҳарбий ёрдам пакетини 20 ноябрь куни юборганди. У зенит қуроллари, HIMARS кўп учирувчи ракета тизимлари, 155 мм ва 105 мм артиллерия снарядлари, танкка қарши Javelin ўқ-дорилари ва бошқа жиҳозлар ва эҳтиёт қисмларни ўз ичига олган.