Башар Асаднинг автомобиллар коллекцияси кимошди савдосига қўйилди (видео)

north_east

Башар Асаднинг саройида совғаларга тўла хона топилди 

Сурия пойтахти Дамашқда мамлакатнинг собиқ президенти Башар Асаднинг коллекциясига оид нодир автомобиллар аукционда тақдим этилди. Бу ҳақда “Ynet” хабар берди.

Нашрнинг ёзишича, савдоларда Суриянинг муваққат президенти Аҳмад аш-Шара ҳам иштирок этиши кутилмоқда. Сотувдан тушадиган барча маблағлар Сурия тараққиёт жамғармасига йўналтирилади. 

Коллекция босқичма-босқич сотувга чиқарилмоқда. Биринчи қисмда учта суперкар намойиш этилган. Энг қиммат лот Ferrari F50 бўлиб, унинг нархи 3-4 миллион доллар атрофида баҳоланмоқда. Дунё бўйича атиги 349 дона шундай автомобиль ишлаб чиқарилган. Машина 4,7 литрли V12 двигатели билан жиҳозланган бўлиб, 520 от кучига эга. У 100 км/соат тезликка 3,7 сонияда чиқиши ва 325 км/соатгача тезлашиши мумкин.

Бошқа лотлар орасида Mercedes SL65 AMG Black Series автомобили ҳам бор. У 500 минг долларга баҳоланган. Ушбу автомобиль 670 от кучига эга V12 двигатели билан ишлаб чиқарилган бўлиб, 300 дона чекланган серияда мавжуд. У 100 км/соат тезликка 3,8 сонияда чиқади, максимал тезлиги эса 320 км/соатни ташкил этади.

Шунингдек, биринчи авлод Audi R8 суперкари ҳам сотувга қўйилган бўлиб, у 5,2 литрли V10 двигатели ва 525 от кучига эга.

ОАВ маълумотларига кўра, Асад умумий қиймати 20 миллион долларга яқин ўнлаб эксклюзив автомобиллар коллекциясини қолдирган. Кейинги босқичларда Ferrari F12 TDF ва F430, Lamborghini Countach ва Diablo, нодир Lamborghini LM002 йўлтанламаси ҳамда Mercedes 600 W100 лимузини ҳам аукционга қўйилиши мумкин.

Эслатиб ўтамиз, Сурияни 20 йилдан ортиқ бошқарган Башар Асад режими 2024 йил декабрида ағдарилганди. Собиқ президент эса Россияга қочиб ўтди. Кремль расмий равишда унга “гуманитар мақсадда” сиёсий бошпана берганини тасдиқлади.