“Барселона” ЕЧЛдаги уй ўйинларини Мадридда ўтказиши мумкин

Каталониянинг “Барселона” клуби Европа Чемпионлар лигаси (ЕЧЛ) плей-офф ўйинларини Мадридда ўтказиши мумкин. Бу ҳақда “Marca” хабар берди.

Манбага кўра, “кўк-анорранглилар”да Европа Чемпионлар лигасининг плей-офф босқичида ўйнаш учун жой йўқ, чунки “Камп Ноу” реконструкция қилинмоқда. Аренанинг  реконструкция жараёнлари февралгача тугамайди. Шу сабабдан “Барселона” шошилинч равишда бошқа вариантларни қидирмоқда.

Барселона шаҳри кенгашининг “Монтжуик” стадионида тадбирлар ўтказиш мажбурияти туфайли клуб мавсумнинг сўнгги ойларида Олимпия стадионида ўйнай олмайди ва бу вазиятни янада оғирлаштирмоқда. UEFA регламенти эса клубларни бутун плей-офф учун стадион танлашга мажбур қилади. Каталония клуби плей-офф вақтида уй аренасини ўзгартира олмайди. Яъни, “Барселона” плей-офф босқичидан олдин Европа Чемпионлар лигаси учун стадион эълон қилиши керак.

Эҳтимол, “Барселона” ЕЧЛда ўз уй ўйинларини “Атлетико” стадионида ўтказар. Яна вариант сифатида “Валенсия” клубининг стадиони “Месталья” ва “Эспаньол” клуби кўриб чиқилмоқда.