“Барселона” “Реал”нинг натижасини такрорлади

12 январь куни Испания Суперкубогининг финал учрашувида “Реал” ва “Барселона” клублари тўқнаш келди. Жамоалар Саудия Арабистонининг Жидда шаҳридаги нейтрал “Қирол Абдулла Спортс Сити” стадионида ўйнади ва “Барселона” “Реал”ни 5:2 ҳисобида мағлуб этиб, “қироллик клуби” билан қарама-қаршилик тарихида ўзига хос рекорд ўрнатди. Бу ҳақда “Opta Sport” хабар берди.

Бу “Барселона”нинг “Эль-Класико” тарихида биринчи марта кетма-кет икки ўйинда тўрт ёки ундан кўп гол уриши ҳисобланади. Бунгача “Реал”га қарши ўйинда Флик шогирдлари Ла Лиганинг 11-турида 4:0 ҳисобида зафар қучганди.

Охирги марта бир жамоа буни 1963 йилда уддалаган, ўшанда “Реал” “Барселона”ни қаторасига икки марта (5:1, 4:0) мағлуб этганди.

Маълумот учун, “Реал” устидан қозонилган ғалаба орқали “Барселона” ўз тарихида 15 марта мамлакат суперкубогини қўлга киритди. “Реал” эса 13 марта Испания суперкубогига эга чиққан.