“Барселона”нинг тажрибали футболчиси “Арсенал”га ўтиши мумкин

“Арсенал” “Барселона”нинг тажрибали ҳимоячиси Серхи Робертога қизиқиш билдирмоқда. Бу ҳақда “Sport.es” хабар берди.

Манбага кўра, агар Каталония клуби унга янги шартнома таклиф қилмаса, испаниялик футболчи АПЛга ўтиши мумкин. “Арсенал” Серхи Робертони тажрибаси ва кўп қиррали ўйин услубига ишонмоқда. Бироқ футболчининг ўзи ҳозирча бошқа вариантларни кўриб чиқмаяпти.

Бир йил олдин “Барселона” Роберто билан шартномани яна бир мавсумга узайтириш имконияти билан янгилаганди, бироқ, агар Серхи кетишига тўғри келса, у ҳолда футболчининг Европада фаолиятини давом эттириши устувор вазифа бўлади.

Маълумот ўрнида, Роберто “Барселона” футбол мактаби тарбияланувчиси. У 2009 йилда катталар футболида дебют қилган, “Барселона Б” жамоасида ўйнаган. 2011 йилда “Барселона”нинг асосий жамоасига қўшилган. Ҳозиргача у Каталония клуби сафида миллий чемпионатда 199 та ўйин ўтказди.

2015/16 йилги мавсумда Серхи Роберто 49 та ўйинда майдонга тушиб, “Барселона”нинг асосий ўйинчисига айланди. Жорий мавсумда футболчи каталонияликлар сафида 8 та ўйинда 3 та гол урди. У 2010 йилдан бери 405 та ўйинда 21 та гол ва 43 та голли узатмага муаллифлик қилди.