“Барселона” ҳимоячиси Роналдунинг жамоасида тўп сурадиган бўлди

Испаниянинг “Барселона” клуби ўз молиявий ҳолатини яхшилаш, яъни жамоа харажатлари учун бериладиган лимитни ошириш мақсадида ҳимоячи Иньиго Мартинесни Саудия Арабистонининг “Ал-Наср” жамоасига сотишга қарор қилди. Бу ҳақда “The Athletic” нашри хабар берди. 

Нашрга кўра, “Барселона” кўп йиллардан бери молиявий қийинчиликларга учраб келмоқда ва бунинг ортидан баъзи муҳим трансферлар амалга ошмай қоляпти. Шу боис жамоа ўз бюджетининг имкониятларини ошириш, яъни ЛаЛига томонидан клуб даромадига қараб бериладиган харажатлар (трансфер ва маош учун ишлатиладиган) чекловига бироз эркинлик бериш мақсадида Иньиго Мартинесни эркин агент сифатида бўлса ҳам қўйиб юборишга қарор қилди. 

Қайд этилишича, испаниялик футболчи келгуси фаолиятини Саудия Арабистони Про Лигасининг “Ал-Наср” жамоасида давом эттиради. 

34 ёшли футболчининг ЛаЛига клубидаги шартномаси яна бир йилга амал қилар эди. Футболчининг шартномани бекор қилиб, ушбу трансферга розилик бергани эса унинг 14 млн еврога тенг маошини клуб балансида қолишига хизмат қилган. Бу “Барселона”га янги футболчиларни рўйхатдан ўтказишда бироз бўлса-да ёрдам беради. 

Эслатиб ўтамиз, яқинда Каталония клубининг яна бир етакчи футболчиси Марк Андре тер Штеген ва жамоа раҳбарияти ўртасига бироз совуқчилик тушган эди.

Нодир Шукуров