Бангладешда ҳарбий самолёт коллеж ҳудудига қулади. Қурбонлар бор (видео)

Бангладеш Ҳарбий-ҳаво кучларининг F-7 BGI ўқув самолёти 21 июль куни пойтахт Дакканинг Уттара ҳудудида ҳалокатга учради. Бу ҳақда “Prothom Alo” хабар берди.

Идоралараро жамоатчилик билан алоқалар департаментининг хабар беришича, самолёт соат 13:06 да ҳавога кўтарилган, шундан сўнг у мактаб ва коллеж биносига қулаган. Дастлабки маълумотларга кўра, самолёт мактаб ошхонасининг томига қулаган, шундан сўнг ёнғин бошланган. Воқеа жойида учта ўт ўчириш бўлими ишламоқда.

Ўт ўчириш бошқармасига кўра, бир киши ҳалок бўлди. Яна тўрт нафари самолёт билан Бирлашган ҳарбий госпиталга етказилган.

“Reuters” агентлигининг хабар беришича, авиаҳалокат оқибатида 50 дан ортиқ киши, жумладан, болалар ва катталар куйиш жароҳатлари билан шифохонага ётқизилган. Ҳалок бўлганлар ва жароҳатланганларнинг сонига аниқлик киритилмоқда.

Эслатиб ўтамиз, жорий йилнинг 12 июнь куни Air India авиакомпаниясининг AI171 рейси бўйича Аҳмадободдан Лондонга йўл олган Boeing 787-8 Dreamliner самолёти Гужаратдаги Аҳмадобод аэропортидан ҳавога кўтарилганидан кўп ўтмай ҳалокатга учраган эди. Самолёт бортида 242 киши – 230 йўловчи ва 12 экипаж аъзоси бўлган. Самолёт тиббиёт коллежи ётоқхонасига бориб, турар-жой ҳудудига қулаганди. Қурбонлар бортдагилар ва шаҳар аҳолиси бўлган. 270 дан ортиқ одам вафот этганди.