Баъзида ҳакамлар ухлаб ётгандек туюлади – Дешам

Кеча, 13 октябрь куни ЖЧ–2026 саралаш босқичи доирасида Франция ва Исландия терма жамоалари учрашуви бўлиб ўтди. Учрашувдан сўнг  Франция терма жамоаси бош мураббийи Дидье Дешам ҳакамлик қарорларидан норози бўлди. Бу ҳақда “Frenchfootballweekly” нашри хабар берди.

Рейкьявикда бўлиб ўтган учрашувда французлар дастлаб 2:1 ҳисобида олдинда бораётган бўлса-да, якунда 2-2 ҳисобидаги дуранг натижага рози бўлишга мажбур бўлишди.

“Рақиб биринчи голни урганида Конега нисбатан қўполлик бўлди. Баъзида ҳакамлар ухлаб ётгандек туюлади … Кичик қоидабузарликларда ҳам нотўғри қарорлар кўп бўлди. Эҳтимол, трибунадаги муҳит ҳакамга таъсир қилгандир. Ўша биринчи гол умуман ўтказилмаслиги керак эди”,  деди Дешам.
Мутахассис ўз жамоасининг ўйинига ҳам танқидий қаради.

“Биз ўйинни яхши назорат қилдик. Исландияликлар атиги иккита зарба йўллашди, аммо иккиси ҳам голга айланди. Биринчи бўлимда етарлича ҳаракат қилмадик. 2:1 ҳисобида олдинда борар эканмиз, иккинчи голни қандай ўтказиб юборганимиз мени ғазаблантиради. Биз ҳаддан ташқари очиқ ўйнадик ва жойлашувда хатога йўл қўйдик”, дейди Дешам.

Маълумот учун, Франция терма жамоаси Жаҳон чемпионати Европа саралаш босқичи “Д” гуруҳида Украина жамоасидан 3 очко фарқ билан пешқадамлик қилмоқда.