Баъзи асбоб-ускуналар божхона божи ва ҚҚСдан озод этилди

Ўзбекистон Республикаси Вазирлар Маҳкамасининг қарори билан ҳукуматнинг айрим қарорларига саноат ишлаб чиқаришида хомашё узлуксизлигини таъминлашга қаратилган ўзгартириш ва қўшимчалар киритилди.

Унга кўра, импорт қилишда божхона божи ва қўшилган қиймат солиғи (ҚҚС)дан озод этиладиган, ўхшаши республикада ишлаб чиқарилмайдиган технологик асбоб-ускуналар рўйхати кенгайтирилди.

Улар:

• ғилдиракли, ҳаракатланадиган кўтарма фермалар ва портал юк ортгичлар;
• минора кранлари;
• тўқимачилик толаларини транспортировка қилиш учун пневматик кўтаргичлар ва конвейерлар;
• товарлар ва материаллар учун узлуксиз ишлайдиган ковшли, тасмали, роликли ва бошқа элеватор ҳамда конвейерлар;
• почта жўнатмаларини саралаш, тахлаш ёки конвертларга жойлаш ёки ўраб боғлаш учун машиналар, почта жўнатмаларини очиш, ёпиш ёки муҳрлаш учун машиналар ҳамда почта маркаларини ёпиштириш ёки ҳисобдан чиқариш учун машиналар;
• ўзгарувчан ток генераторлари (номинал чиқиш қуввати 375 кВАдан, 750 кВАгача ва 750 кВАдан юқори); 
• юқори ҳароратли пайвандлаш учун машина ва аппаратлар;
• йўлсиз шароитларда фойдаланиш мўлжалланган, электромеханик трансмиссияга эга (дизел ва электр двигателлари ўрнатилган), юк кўтариш қуввати 50 тоннадан юқори бўлган юк машинаси (автомобил-самосвал);
• иссиқхона учун ускуна ва жиҳозлар.

Ҳужжатда инвестицияларни жалб қилиш, саноатни ривожлантириш ва савдони тартибга солиш масалалари бўйича ҳукумат комиссиясига қўшимча ваколатлар бериш белгиланган.

Акобир Сайидов