Азизбек Ўрунов Озиқ-овқат маҳсулотлари хавфсизлиги қўмитаси раиси бўлди

Ўзбекистон Республикаси Президентининг Жаҳон савдо ташкилоти бўйича вакили Азизбек Аллаберганович Ўрунов ўриндошлик асосида Ўзбекистон Республикаси Озиқ-овқат маҳсулотлари хавфсизлиги қўмитаси раиси лавозимига тайинланди. Бу ҳақда Ўзбекистон Республикаси Президентининг тегишли қарори қабул қилинди.

Шунингдек, Элёр Холматович Талабоев Ўзбекистон Республикаси Озиқ-овқат маҳсулотлари хавфсизлиги қўмитаси раисининг комплаенс ва коррупцияга қарши ички назорат бўйича ўринбосари лавозимига тайинланди ва шу муносабат билан Ўзбекистон Республикаси Президенти Администрацияси раҳбари котибияти бош инспектори лавозимидан озод  этилди. 

Фурқат Зокирович Жалилов Ўзбекистон Республикаси Озиқ-овқат маҳсулотлари хавфсизлиги қўмитаси раисининг ўринбосари лавозимига тайинланди ва шу муносабат билан Ўзбекистон Республикаси Президенти Администрацияси Ҳуқуқий экспертиза ва комплекс таҳлил қилиш департаменти бош инспектори лавозимидан озод этилди.

Маълумот учун, Азизбек Ўрунов 2025 йилнинг июлидан буён Ўзбекистон Республикаси Президентининг Жаҳон савдо ташкилоти бўйича вакили лавозимида ишлаб келмоқда.