Аёл эрини сеҳр-жоду билан ўлдирмоқчи бўлди

Туркиянинг Истанбул шаҳрида Оила суди аёл эрига нисбатан сеҳр-жоду қилгани учун жуфтликни ажратишга қарор қилди. Бу ҳақда “Oda TV” хабар берди.

Қайд этилишича, Истанбулда яшовчи З.Т. исмли эркак ва Н.Т. исмли аёл 2004 йилда турмуш қурган. Жуфтликнинг ушбу никоҳдан икки нафар фарзанди дунёга келган. Даъвога кўра, З.Т. исмли эркак бир куни эрталаб уйғонганида хотини Н.Т.нинг қўлида қайчи билан сочини кесаётганини кўриб қолган. З.Т. хотинидан нега бундай қилаётганини сўраганида, “Касал бўлиб ўлишинг учун сенга сеҳр-жоду қиляпман”, деган жавобни олган. 

Қаттиқ шокка тушган З.Т. ўша кунининг ўзида уйнинг ҳамма жойини қидириб чиққан. Уйнинг турли бурчакларидан 5-6 та муҳрланган тумор топиб олган З.Т. уларни яшириб қўйган. Шундан сўнг у хотини Н.Т.ни яқиндан кузата бошлаган. Даъвога кўра, у хотинининг телефонида бошқа бир эркак билан ёзишмаларини кўриб қолган. Хотинини кузатишда давом этган З.Т. унинг бир эркак билан яқин муносабатда учрашиб юрганини билиб олган.

Хиёнатга учраганини билган З.Т. қўлидаги туморларни ва хотинининг хуштори билан ёзишмаларини далил сифатида тақдим этиб, ажрашиш учун судга даъво аризаси киритган. Истанбул Оила судига тақдим этилган аризада шундай дейилган: 

“Хотиним менга хиёнат қилди. У тинмай менга сеҳр-жоду қилиб келади. Хотиним бутун кунини кўчада хуштори билан ўтказади. Мунтазам равишда спиртли ичимликлар истеъмол қилади, уй ва болалар парвариши билан шуғулланмайди. Менга ўлим сеҳрини қилган ва хиёнат қилган хотиним Н.Т. билан ажрашишни хоҳлайман. Менга маънавий зарар етказгани учун Н.Т. дан 700 минг лира товон пули ундирилишини сўрайман”.

Қарши даъво аризаси билан чиққан Н.Т. исмли аёл эса сеҳр-жоду ҳақидаги айбловларни рад этган. Даъво аризасида эрига ҳеч қачон сеҳр қилмаганини, уйдан топилган туморлар эса шунчаки барака дуоси эканини иддао қилган 

“Ҳаддан ташқари зиқна бўлган эрим уй эҳтиёжлари ёки шахсий харажатларим учун мендан тинмай чекларни ва ҳисоб-китобларни талаб қилади. Бундай ҳаёт мен учун чидаб бўлмас даражага келди. Оиламиз пойдевори дарз кетишида аслида эрим бош айбдордир”, дея эридан 200 минг лира товон пули талаб қилган Н.Т.

Суд З.Т. томонидан тақдим этилган туморларнинг ҳақиқатан ҳам сеҳр-жоду эканлигини аниқлаш учун уларни экспертга юборган. Араб тили таржимони бўлган эксперт туморлардаги ёзувларни ўқий олмагач, масжид имомидан ёрдам сўраган. Туморларни ўқиган масжид имоми бунинг ҳақиқатан ҳам сеҳр-жоду эканини ва агар ушбу ёзувлар қўлда қайтадан кўчириб ёзилса, сеҳр яна кучга кириши мумкинлигини айтган. Эксперт ҳам судга тақдим этган ўз хулосасида масжид имомининг сўзларини келтириб, туморлар сеҳр-жоду эканини, ушбу сеҳр матнини қоғозга тушира олмаслигини, акс ҳолда жоду қайтадан кучга кириши мумкинлигини баён қилган.

Суд ўз қарорини эълон қилиб, ҳар икки томонни ҳам тенг даражада айбдор деб топган ва жуфтликни расман ажратган.

Эслатиб ўтамиз, аввалроқ Тожикистоннинг Душанбе шаҳрида 38 ёшли маҳаллий турғун фолбинлик ва сеҳр-жоду билан шуғуллангани учун жаримага тортилган эди.