Австралиялик эркак сунъий юрак билан тирик қолган дунёдаги биринчи одам бўлди

Австралияда 40 ёшли эркак тўлиқ сунъий юрак билан 100 кун яшаб рекорд ўрнатди. Бу ҳақда ABC хабар берди.

Қайд этилишича, 2024 йил ноябрь ойида Сиднейда жарроҳлар 6 соатлик операция давомида титандан ясалган BiVACOR Total Artificial Heart сунъий юрагини оғир юрак етишмовчилигига чалинган беморга ўрнатган. Бу сунъий юрак аввалгиларидан фарқли равишда механик қисмлари эскиришга учрамайди.

Қурилма австралиялик ихтирочи Даниэль Тиммс томонидан ишлаб чиқилган. У болалигида отаси билан сув насосларини таъмирлаб, бу ишга қизиққан. Кейинчалик унинг отаси юрак хасталигидан вафот этган, бу эса Тиммсни сунъий юрак устида ишлашга ундаган.

У дастлабки сунъий юракни 2024 йил июлида Техас юрак институтида беморга ўрнатган, аммо бемор шифохонадан чиқмаган. Бу сафарги Австралиядаги бемор ушбу қурилма билан 100 кун яшаганидан сўнг унга инсон юраги трансплантация қилинган. Ҳозирда у яхши ҳолатда тузалмоқда.

Ҳозирда BiVACOR юраги ташқи аккумулятор билан ишлайди, аммо келажакда симсиз қувватланиш технологияси жорий қилиниши мумкин.

Австралияда ҳар йили 5 000 га яқин одам юрак етишмовчилиги сабаб вафот этади. Мамлакатда донорлар етишмовчилиги туфайли юрак трансплантациялари 19 фоизга камайган. BiVACOR эса келажакда инсон юраги трансплантациясига муқобил вариантга айланиши мумкин.

Бу йил Австралияда яна тўрт беморга BiVACOR юраги ўрнатилади.

Эслатиб ўтамиз, аввалроқ Италияда илк бор уриб турган юрак трансплантацияси ўтказилганди.