“Australian Open”нинг мукофот пули рекорд даражага етди

Жорий йилнинг январь ойида бўлиб ўтадиган Австралия очиқ чемпионатининг соврин жамғармаси рекорд даражага етди. Турнир ташкилотчилари умумий мукофот пули 16 фоизга ошиб, 111,5 миллион Австралия доллари (тахминан 75 миллион АҚШ доллари)ни ташкил этишини эълон қилди. Бу ҳақда “Reuters” хабар берди.

Манбага кўра, йилнинг илк “Катта дубулға” турнирида эркаклар ва аёллар ўртасидаги яккалик баҳслари ғолиблари ҳар бири 2,79 миллион АҚШ доллари миқдорида мукофот пулини қўлга киритади. Бу кўрсаткич ўтган йилгига нисбатан 19 фоизга юқори ҳисобланади.

Биринчи босқичда мағлуб бўлган теннисчилар 100 750 АҚШ доллари олади. Ҳатто, саралаш босқичининг биринчи даврасида ютқазган иштирокчиларга ҳам 27 200 АҚШ доллари тўланади.

Турнир директори Крейг Тайлининг таъкидлашича, бу қарор Австралиянинг барча даражадаги теннисчиларга юлдузлардан тортиб, эндигина фаолиятини бошлаётган теннисчиларгача, уларни қўллаб-қувватлашга қаратилган сиёсатини акс эттиради.

“2023 йилдан буён саралаш босқичидаги мукофот пулларини 55 фоизга оширдик, шунингдек, ўйинчиларга яратилаётган шароит ва имтиёзларни кенгайтирдик. Бу орқали профессионал тенниснинг барча иштирокчилар учун барқарор бўлишини таъминлаяпмиз”, дейди Тайли.

Унинг сўзларига кўра, барча даражадаги спортчиларни қўллаб-қувватлаш мухлислар учун янада бой истеъдодлар базаси ва қизиқарли спорт сюжетларини яратишга хизмат қилади.

Маълумот учун, “Australian Open” жорий йилнинг 18 январь куни Мельбурн Паркда старт олади. Мусобақада Янник Синнер ва Мэдисон Кейс амалдаги чемпионлик унвонларини ҳимоя қилади.