“Атлетико”га мағлуб бўлган “Барса” мураббийи ўйиндан кейин нималар деди?

“Барселона” бош мураббийи Ҳанс-Дитер Флик кеча, 8 апрель куни тунда бўлиб ўтган Европа Чемпионлар Лигаси чорак финал дастлабки учрашувидан ўрин олган “Атлетико Мадрид”га (0:2) қарши ўйиндаги мағлубиятдан сўнг ўз фикрлари билан ўртоқлашди.

“Мағлуб бўлган бўлсак ҳам, жуда яхши имкониятлар яратдик… Улар ҳам жуда яхши ўйнашди, лекин биз таслим бўлмаймиз.

Албатта, биз ўзимизга ишонамиз. 10 киши бўлиб ҳам жуда яхши ўйнадик. Уларга қарши ҳимояланиш осон эмасди, аммо бизда имкониятлар бўлди. Биз ижобий кайфиятдамиз. Кейинги ўйинда бор кучимизни берамиз, бизда имконият бор ва шу имкониятдан фойдаланишга ҳаракат қиламиз.

Улар иккита гол урди, чунки уларда жуда сифатли ўйнади. Биринчи гол олдидан эса, менимча, биз яхшироқ ҳимояланишимиз керак эди”, дейди германиялик мутахассис.

Шунингдек, Флик ҳакамликдан ҳам норозилигини билдирди, айниқса бир нечта баҳсли вазиятлар бўйича.

“Пау Кубарсининг қизил карточкаси берилиши ҳам, берилмаслиги ҳам мумкин эди. Менимча, бу майдондан четлатиш учун етарли эмасди, чунки тўп унинг орқасида эди.

Мен учун аниқ бўлган вазият – Хуан Муссо ҳужумни бошлаган пайтда ва Марк Пубиль тўпга қўл теккизган ҳолат. Нима учун VAR аралашмаганини тушунмадим. Бу ақлга сиғмайди. Ҳаммамиз хатога йўл қўйишимиз мумкин, бу нормал ҳолат, лекин унда VAR нима учун кераклигини тушунмайман. Бу пенальти, иккинчи сариқ карточка ва майдондан четлатиш бўлиши керак эди.

Энди нима бўлса ҳам биз буни қабул қилишимиз керак ва келаси сешанба куни бўладиган ўйинга эътибор қаратишимиз лозим. Биз охиригача курашамиз”, дейди Флик. 

Маълумот ўрнида, жавоб ўйини жорий йил 14 апрель оқшомида Мадридда бўлиб ўтади.

Рамазон Усанов