“Арсенал”нинг собиқ дарвозабони даҳшатли ЙТҲда вафот этди

Бугун, 16 апрель куни “Арсенал” ва “Ювентус” клубларининг собиқ посбони, таниқли дарвозабон Александр Маннингер 48 ёшида вафот этди. Унинг автомобилини поезд уриб кетган. Бу ҳақда “Kronen Zeitung” хабар берди.

Қайд этилишича, Лондоннинг “Арсенал”, Туриннинг “Ювентус” клублари ва Австрия терма жамоаси собиқ дарвозабони Александр Маннингер бугун, 16 апрель куни эрталаб ЙТҲ оқибатида ҳалок бўлган. Ҳодиса Нусдорф-ам-Хаунсберг (Австриядаги коммуна) ҳудудидаги тартибга солинмаган темирйўл кесишмасида юз берган.

“Полиция маълумотларига кўра, 48 ёшли собиқ голкипернинг автомобили яқинлашиб келаётган поезднинг айнан олдига чиқиб қолган. Поезд машинани бир неча метр судраб борган. Машинист ва 25 нафарга яқин йўловчи жабрланмаган.

Қутқарувчилар воқеа жойига етиб келиб, Маннингерни автомобилдан чиқариб олишган ва реанимация ишларини, жумладан, дефибриллятор ёрдамида бошлашган. Бироқ спортчининг ҳаётини сақлаб қолишнинг имкони бўлмаган. Ҳалокат сабаблари ўрганилмоқда. Терговга кесишмадаги сигнал тизимини текширадиган эксперт жалб қилинган”, дейилади хабарда.

Маннингер фаолиятини “Аустрия” (Зальцбург) клубида бошлаган, 1997 йилда эса Англия Премьер-лигасига (“Арсенал”га) ўтган биринчи австриялик футболчига айланган. Дебют мавсумидаёқ (1997/98) у Англия чемпиони ва Англия Кубоги соҳиби бўлган.

Кейинчалик у Италияда “Фиорентина”, “Торино”, “Болонья”, “Брешиа”, “Сиена” ва “Ювентус” клубларида тўп сурган. “Ювентус” билан 2011/12 йилги мавсумда ҳам чемпионликни қўлга киритган. Маннингер футболчилик фаолиятини 2017 йилда “Ливерпуль”да якунлаган эди.

Австрия миллий терма жамоасида Маннингер 1999 йил август ойида Швецияга қарши ўртоқлик учрашувида дебют қилган ва жами 33 та ўйинда майдонга тушган.

Эслатиб ўтамиз, аввалроқ Гананинг “Берекум Челси” футбол клуби ҳужумчиси Доминик Фримпонг жамоа автобусига қилинган қуролли ҳужум оқибатида вафот этганди.