“Арқадағ”га Жапаровнинг ўзи шофёрлик қилди (видео)

Бугун, 22 апрель куни Туркман халқининг миллий етакчиси, Туркманистон Халқ Маслаҳати Раиси Гурбангули Бердимуҳамедов Қозоғистоннинг Туркистон шаҳридан Қирғизистоннинг Иссиқкўл вилоятига амалий ташриф билан борди. Бу ҳақда Қирғизистон Президенти матбуот хизмати хабар берди.

Марказий Осиё давлатлари бўйлаб сафар қилаётган Гурбангули Бердимуҳамедовни Иссиқкўл халқаро аэропортида Қирғизистон Республикаси Президенти Садир Жапаров кутиб олди. Аэропортдаги устунларга икки давлат байроқлари осилди, гилам ёзилди ва фахрий қоровул саф тортган.

Ташриф доирасида Садир Жапаров ва Гурбангули Бердимуҳамедов ўртасида икки томонлама музокаралар, шунингдек, қатор маданий тадбирларга ташриф режалаштирилган.

Қирғизистон Президентининг матбуот хизмати томонидан эълон қилинган кадрлардан шуни кўриш мумкинки, етакчилар икки давлат байроқлари ўрнатилган Mercedes-Benz русумли машинага ўтирган. Садир Жапаровнинг ўзи автомобилни бошқариб кетган.

Эслатиб ўтамиз, Гурбангули Бердимуҳамедов кеча, 21 апрель куни Қозоғистонга борганди. Туркистон аэропортида олий мартабали меҳмонни Қозоғистон Президенти Қосим-Жомарт Тўқаев кутиб олди. Улар биргаликда туркий дунёнинг энг буюк маънавий, тарихий ва маданий қадамжоларидан бири – UNESCO'нинг Жаҳон мероси рўйхатига киритилган Хўжа Аҳмад Яссавий мақбарасини зиёрат қилди. Бугун, 22 апрель куни Қосим-Жомарт Тўқаев Гурбангули Бердимуҳамедов билан норасмий учрашув ўтказди. Газ соҳасида ҳамкорликни кенгайтириш, хусусан, Қозоғистоннинг хорижий ҳамкорлар билан биргаликда Галкиниш конини ўзлаштириш лойиҳасида иштирок этишига алоҳида эътибор қаратилди.