Аргентина ЖЧ дебютантини қийинчилик билан енгди

Бугун, 4 июль куни Аргентина миллий терма жамоаси 2026 йилги Жаҳон чемпионати 1/16 финал босқичида Кабо-Вердени қўшимча вақтда 3:2 ҳисобида мағлуб этиб, кейинги босқичга йўл олди.

Майами шаҳрида бўлиб ўтган учрашувда Аргентина сафида Лионель Месси 29-дақиқада ҳисобни очган бўлса, Кабо-Верде таркибида Дерой Дуарте 59-дақиқада ҳисобни тенглаштиришга муваффақ бўлди. Ўйиннинг асосий вақти 11 ҳисобида дуранг билан якунланди. Қўшимча бўлимнинг 92-дақиқасида Лисандро Мартинес жамоасининг иккинчи голини урди. Сидней Кабрал эса 103-дақиқада голи билан яна бир бор ҳисобни тенглаштирди. Учрашув тақдирини эса 111-дақиқада Кабо-Верде футболчиси Динейнинг ўз дарвозасига киритган автоголи ҳал қилди.

Ушбу баҳсда Лионель Месси учун Жаҳон чемпионатлари доирасидаги 20-голини урди. Шу тариқа у мундиаллар тарихидаги энг яхши тўпурар сифатидаги етакчилигини янада мустаҳкамлади. Унинг энг яқин таъқибчиси — Франция терма жамоаси ҳужумчиси Килиан Мбаппе ҳисобида 18 та гол мавжуд.

Месси шунингдек Жаҳон чемпионатларидаги 30-учрашувини ўтказиб, ушбу кўрсаткич бўйича Португалия терма жамоаси ҳужумчиси Криштиану Роналдуни (26 та ўйин) ортда қолдирди.

1/8 финалда энди Аргентина Миср миллий терма жамоасига қарши майдонга тушади. Миср 1/16 финалда Австралияни 1:1 ҳисобидаги дурангдан сўнг пенальтилар сериясида 4:2 ҳисобида мағлуб этган эди. Аргентина – Миср учрашуви жорий йилнинг 7 июль куни Атланта шаҳрида бўлиб ўтади.