Аргентина Президенти АҚШ ва Бразилияни айблади

Аргентина Президенти Хавьер Милей 2026 йилги Жаҳон чемпионати давомида мамлакат миллий терма жамоасига нисбатан билдирилган танқидлар бир нечта давлатлар томонидан мувофиқлаштирилган кампаниянинг бир қисми бўлганини даъво қилди. Бу ҳақда “The Guardian” хабар берди.

Нашр маълумотига кўра, Милей Аргентина терма жамоасига нисбатан танқидлар, мухлислар орасидаги ирқчилик бўйича айбловлар ҳамда Лионель Месси жамоаси FIFA томонидан яширинча қўллаб-қувватланаётгани ҳақидаги фитна назариялари ортида мувофиқлаштирилган “Аргентинага қарши кампания” турганини айтган.

Аргентина Президентининг таъкидлашича, ушбу кампания АҚШ Демократик партияси, шунингдек, Бразилия ва Мексика ҳукуматлари томонидан молиялаштирилган.

“Бу эркинлик ғояларининг амалга ошишини истамайдиган прогрессив кучларнинг ишидир”, дейди Милей.

Шунингдек, у Президент Луис Инасиу Лула да Силва бошчилигидаги Бразилия ҳукумати мазкур кампанияни молиялаштиришда энг катта ҳиссани қўшганини ҳам даъво қилди.

Эслатиб ўтамиз, аввалроқ Аргентина терма жамоаси сардори Лионель Месси 2026 йилги Жаҳон чемпионати ярим финалидан кейин FIFA ва ҳакамлар томонидан жамоага алоҳида имтиёз берилаётгани ҳақидаги айбловларни инкор этиб, ҳаммаси жамоанинг ўз кучи билан эришилаётганини таъкидлаганди.