Андижонда “залог”га олингани айтилган гўдак 5 ой ўтиб экспертизага юборилди

Ижтимоий тармоқларда Андижон вилоятида қўшмачи аёл ёш гўдакларни “залог”га олиб, қўлидаги “қиз”ларни ишлатаётгани айтилган видео тарқалди. Унда аёл ёш болани уриб, сўккани ва қўрқитганини кўриш мумкин. QALAMPIR.UZ воқеага аниқлик киритишга уринди.

Бола ҳуқуқлари бўйича вакил (Болалар омбудсмани) Сурайё Раҳмонованинг бизга маълум қилишича, видеодаги ҳолат бундан 5 ой аввал содир бўлган.

Тасвирларда кўриниш берган аёл танишининг уйида унинг 3 яшар боласига моддий манфаатдорлик учун қараб турган, яъни энагалик қилган.

Раҳмонованинг айтишича, боланинг “залог”да бўлгани ҳақидаги хабарлар ҳақиқатга тўғри келмайди. Бола ички ишлар органлари ходими ва гувоҳлар иштирокида онасига топширилган.

Видео ижтимоий тармоқларда тарқалиб, катта шов-шувларни келтириб чиқаргач, воқеа содир бўлганидан беш ой ўтиб (!) кеча, 29 ноябрь куни болага суд-тиббий экспертизаси тайинланган. Текширув натижасида унга бирон бир жароҳат етказилмагани аниқланган. 

QALAMPIR.UZ’нинг фикрича, ҳар қандай жароҳат етган тақдирда ҳам ундан беш ой ичида ҳеч қандай из қолмайди. Шундай экан, болани экспертизага судраб, овора қилиш шартмиди?! 

Эслатиб ўтамиз, олдинроқ Қашқадарё вилояти Китоб туманида 14 ёшли қизни етти ой давомида жинсий қулликда сақлаган аёл қамоққа олинганди.