Андижонда хотинини ўлдириб қочиб кетган эркак ушланди

Аввалроқ, Андижон шаҳрида эркак жанжал оқибатида турмуш ўртоғини йўлнинг ўртасида қасддан ўлдириб кетгани хабар қилинганди. Андижон вилояти Ички ишлар бошқармаси ҳодиса бўйича қўшимча ахборот берди. 

Маълум бўлишича, кеча, 4 июль куни соат 9:30 ларда Андижон шаҳрида яшовчи 48 ёшли эркак  43 ёшли турмуш ўртоғи билан жанжаллашган. Андижон шаҳрининг Ўрикзор маҳалласида келиб чиққан жанжал оқибатида у аёлни бўйин қисмига хўжалик пичоғи билан уриб, жарохат етказган ва воқеа жойидан яширинган. Олган тан жароҳати оқибатида жабрланувчи воқеа жойида вафот этган.

Мазкур холат юзасидан Андижон шаҳар прокуратураси томонидан Ўзбекистон Республикаси Жиноят кодексининг 97-моддаси (Қасддан одам ўлдириш) 1-қисми билан жиноят иши қўзғатилиб, гумонланувчи А.Д.ни ушлаш бўйича тезкор-қидирув чоралари кўрилган.

Олиб борилган тадбирлар жараёнида гумонланувчи А.Д. Андижон вилояти Олтинкўл тумани Кўмакай маҳалласи ҳудудида тунги хизматга жалб қилинган ходимлар томонидан аниқланиб, қўлга олинган. Ҳозирда гумонланувчи процессуал тартибда қамоққа олинган бўлиб, тергов-суриштирув ҳаракатлари давом этмоқда.

Эслатиб ўтамиз, 1 июль куни Андижон вилояти Хўжаобод туманида профилактика инспектори чақирув вақтида пичоқланган ва олган жароҳати оқибатида вафот этган эди. Инспекторни пичоқлаган 65 ёшли фуқаро эса 4 июль куни қабристондаги маккапоя ичида қўлга олинди.