Америка полицияси Президент кортежини тўхтатди (видео)

Нью-Йорк шаҳрида БМТ Бош Ассамблеясининг 80-сессияси арафасида дипломатик кортежлар иштирокида қизиқ воқеа юз берди. АҚШ Президенти Дональд Трамп кортежи учун барча йўллар тўсиб қўйилган бир пайтда Франция Президенти Эммануэль Макроннинг машинаси ҳам полиция томонидан тўхтатилди.

Ижтимоий тармоқларда Макроннинг машинадан тушиб, Трампга қўнғироқ қилгани акс этган кадрлар тарқалди.

“Мен кўчада кутяпман. Ҳамма йўллар сиз учун ёпилган экан”, деган у.

Шунингдек, Франция етакчиси Трампга телефонда ҳазиллашиб “Йўлни очинг” деганини ҳам эшитиш мумкин.

2025 йилнинг 9 сентябрь куни БМТ Бош Ассамблеясининг 80-сессияси ўз ишини бошлади. Анъанага мувофиқ, сессия доирасида юқори даражадаги ҳафта ташкил этилади. Умумий сиёсий мунозаралар 23–29 сентябрь кунлари бўлиб ўтиши режалаштирилган.

Эслатиб ўтамиз, аввалроқ Франция Президенти Эммануэль Макрон БМТ Бош Ассамблеясида Фаластинни мустақил давлат сифатида тан олиш масаласи атрофида бир нечта давлатларни бирлаштириш орқали АҚШ ва Исроил сиёсатига қарши глобал мувозанат яратишни режалаштираётгани хабар қилинганди. 22 сентябрь куни Нью-Йоркда БМТ штаб-квартирасидаги нутқида Макрон Фаластинни расман давлат сифатида тан олганини эълон қилди.