Алиев ва Эрдўғаннинг йўлига Арманистон эмас, Эрон тўғаноқ бўлаётгани айтилди

Туркия Президенти Ражаб Тойиб Эрдўған Зангезур йўлагини яратиш билан боғлиқ қийинчиликлар Арманистон билан эмас, балки Эрон позицияси билан боғлиқлигини айтди. У бу ҳақда Озарбайжонга ташрифини якунлаб, Туркияга қайтаётиб журналистлар билан қилган мулоқотида сўз очган. 

“Зангезур йўлагига келсак, муаммо Арманистон билан боғлиқ эмас, муаммо Эрон билан боғлиқ”, дейди Эрдўған.

Шунингдек, Туркия раҳбари Эроннинг хатти-ҳаракатлари нафақат Озарбайжон, балки Туркияни ҳам ранжитишини айтган. 

“Бундан ташқари, афсуски, ташиш учун жуда юқори тарифлар жорий этилган. Тез орада бу муаммони ҳал қиламиз деган умиддаман”, дейди Президент. 

Унинг сўзларига кўра, агар Эрондан ижобий ёндашув бўлса, бугун Туркия, Озарбайжон ва Эрон ҳам автомобиль, ҳам темир йўллар орқали бир-бири билан интеграциялашган бўларди. Бундан ташқари, унинг фикрича, Пекин-Лондон йўналиши очилган бўлар эди.

Эрдўған Эроннинг айнан қайси позицияси Туркияга мос келмаслиги ҳақида қўшимча маълумот бермади. 

Озарбайжон Арманистоннинг Сюник вилояти ҳудудидан ўтиб, Нахичеванни мамлакатнинг асосий қисми билан боғлайдиган Зангезур йўлагини яратиш истагини бир неча бор билдирган. Автомобиль ва темир йўллар қуриш режалаштирилган. Бу, жумладан, Каспий денгизи орқали Туркияни Нахичеван, Озарбайжон ва Марказий Осиё мамлакатлари билан боғлайди. Шу билан бирга, Ереван 2020 йил кузида Тоғли Қорабоғ атрофидаги можаро ҳудудида ҳарбий ҳаракатларга чек қўйган 9 ноябрдаги уч томонлама баёнот бундай йўлак очишни назарда тутмаслигини ва бундай масалаларни муҳокама қилишдан бош тортишини таъкидламоқда.