Алиев Ўзбекистонга Арманистон бўйича баёнот қабул қилишдаги ёрдами учун миннатдорлик билдирди

Ўзбекистон Ислом Ҳамкорлик Ташкилоти ва Туркий тилли давлатлар ҳамкорлик кенгаши доирасида Озарбайжонга Арманистоннинг қуролли тажовузи бўйича тегишли баёнотларни қабул қилишда ёрдам берган. Бу ҳақда Озарбайжон маҳаллий матбуоти хабар бермоқда. 

Кеча, 18 август куни Озарбайжон Президенти Ўзбекистоннинг фавқулодда ва мухтор элчиси Баҳром Ашрафхоновни қабул қилган. Президент элчига Ўзбекистонга аъзо давлат сифатида жорий йилнинг 12 июль куни Озарбайжон-Арманистон чегарасининг Товуз вилояти йўналиши бўйича Озарбайжонга навбатдаги Арманистон тажовузи муносабати билан Ислом ҳамкорлик ташкилоти ва Туркий тилли давлатлар ҳамкорлик кенгаши доирасида тегишли баёнотларни қабул қилишда ёрдам бергани учун миннатдорчилик билдирган. 

Маҳаллий хабарларда таъкидланишича, элчи Баҳром Ашрафхонов Ўзбекистон Арманистон-Озарбайжон можаросининг Озарбайжоннинг ҳудудий яхлитлиги доирасида ҳал қилинишини доимий равишда қўллаб-қувватлаётганини таъкидлаган. 

Президент Илҳом Алиев Озарбайжоннинг ҳудудий яхлитлигини ҳар томонлама қўллаб-қувватлагани учун Ўзбекистонга миннатдорлик билдирган. 

Алиев Ўзбекистон Президенти Шавкат Мирзиёевнинг табриклари учун миннатдорлик билдириб, элчидан Президентга салом ва эзгу тилакларини етказишини сўради.

Маълумот учун, икки давлат чегарасидаги вазият 12 июль куни кескинлашди. Озарбайжонда Арманистон Қуролли кучлари ҳужумга ўтгани айтилди. Расмий Ереван ҳам озарбайжонлик аскарлар ҳужумга ўтганини сабаб қилиб кўрсатди. Ҳозиргача расмий Баку 12 нафар ҳарбий жумладан генерал-майор Пўлат Гашимов ҳам ҳалок бўлганини билдирди. Ереван эса 4 қурбон ва 10 жароҳатланган аскар ҳақида маълумот берди.