Alibaba робототехника учун янги СИ моделини тақдим этди

Alibaba Group робототехника учун мўлжалланган RynnBrain номли янги сунъий интеллект (СИ) моделини тақдим этди. Бу ҳақда компания сайтида хабар берилди.

Қайд этилишича, ишланма компаниянинг тадқиқот маркази – DAMO Academy томонидан яратилган. Компания моделни бутун дунё ишлаб чиқувчилари учун очмоқда, яъни ундан бепул фойдаланиш ва уни такомиллаштириш мумкин бўлади.

Янги СИ модели реал дунёдаги қурилмаларни бошқарувчи тизимлар – роботлар, саноат ускуналари ва автоном қурилмалар учун мўлжалланган. Чат-ботлардан фарқли равишда, бундай моделлар нафақат матнни тушуниши, балки тасвир, макон ва ҳаракат билан ҳам ишлай олиши керак.

RynnBrain роботларга объектларни аниқлаш ва кейинги ҳаракатлар бўйича қарор қабул қилишда ёрдам беради. Модель Qwen3-ВЛ базасида ўқитилган бўлиб, у тасвир ва матнни бир вақтнинг ўзида қайта ишлаш имкониятига эга мултимодал тизим ҳисобланади.

RynnBrain бир нечта версияда GitHub ва Hugging Face платформаларига жойлаштирилган. Бу кириш тўсиғини пасайтиради: университетлар, стартаплар ва кичик интеграторлар қиммат корпоратив ечимларни харид қилмасдан туриб моделни тезроқ синаб кўришлари мумкин бўлади.

Эслатиб ўтамиз, аввалроқ БМТ Бош ассамблеяси сунъий интеллект хавф-хатарларини ўрганадиган 40 кишилик мустақил халқаро илмий панелни ташкил этишни маъқуллагани ҳақида хабар берилган эди.