АҚШнинг Марказий Осиё бўйича инвестиция фондига россиялик инвестор раҳбар бўлди

АҚШда Марказий Осиёга инвестиция киритиш учун ташкил этилган жамғармага Россияда туғилган инвестор раҳбар этиб тайинланди. Бу ҳақда жорий йилнинг 14 июль куни “The Guardian” нашри хабар берди.

Нашр маълумотларига кўра, Санкт-Петербургда туғилган венчур инвестор Константин Соколов АҚШ Давлат департаменти ҳузурида Марказий Осиё ва Кавказга инвестиция киритиш учун ташкил этилган Tripp+ жамғармасига раҳбарлик қилади.

Арманистон ва Озарбайжон ўртасида қурилиши режалаштирилган транспорт йўлаги – “Trump Route for International Peace and Prosperity” (“Трамп халқаро тинчлик ва фаровонлик йўли”) номи билан аталган жамғарманинг бошланғич капитали 200 миллион АҚШ долларини ташкил этади. Жамғарма Арманистон, Озарбайжон, Грузия, Қозоғистон, Қирғизистон, Тожикистон, Туркманистон ва Ўзбекистонга инвестициялар, грантлар ҳамда қарзлар ажратишни кўзда тутади.

Мутахассислар жамғарма бошқаруви Константин Соколовнинг ўзига катта фойда келтиришига шубҳа билдирган. Бироқ уларнинг таъкидлашича, Дональд Трамп маъмурияти “айниқса иқтисодий инвестициялар соҳасида ташқи ёрдамни қайта йўналтириш”ни мақсад қилгани сабабли жамғармага давлат маблағлари ажратилиши кўпайиши мумкин.

Маълумот учун, Константин Соколов 1975 йили Санкт-Петербургда туғилган. У СССР парчаланганидан кейин АҚШга кўчиб ўтган, Чикаго университетининг бизнес мактабида таҳсил олган ва Чикагода ўзининг IJS Investments инвестиция жамғармасига асос солган. Шунингдек, у АҚШнинг Qwest (Lumen) телекоммуникация компанияси ҳамда Британиянинг Centrica нефть корпорациясида раҳбарлик лавозимларида ишлаган. Айни пайтда у Арманистоннинг Viva телекоммуникация компанияси акциядорларидан бири ҳисобланади.

“The Guardian” қайд этишича, Соколов аввал Оқ уйда бал зали қуриш бўйича баҳсларга сабаб бўлган лойиҳага сармоя киритган. Ундан аввал эса Дональд Трампнинг сайлов кампаниясига 12 миллион АҚШ долларидан ортиқ маблағ йўналтирган.

Эслатиб ўтамиз, аввалроқ АҚШ федерал суди Президент Дональд Трамп маъмуриятининг ҳукумат томонидан амалга оширилган “сиёсий таъқиблар” қурбонларига товон тўлаш учун ташкил этилаётган қарийб 1,8 миллиард долларлик жамғарма фаолиятини вақтинча тўхтатиб қўйганди.