АҚШнинг 14 штати Трамп ва Маскни судга берди

АҚШнинг 14 штати вакиллари АҚШ Президенти Дональд Трамп ва Ҳукумат самарадорлиги департаменти (DOGE) раҳбари Илон Маск устидан судга мурожаат қилди. Бу ҳақда “ABC News” хабар берди.

Даъво аризасида айтилишича, Маскнинг тайинланиши АҚШ Конституциясига зид саналади, чунки у Сенат томонидан тасдиқланиши керак бўлган лавозимда ишлайди.

“Демократия учун давлат ҳокимиятининг ягона, сайланмаган шахс қўлида тўпланишидан каттароқ хавф йўқ”, дейилади даъво аризасида.

Маълум қилинишича, даъво Нью-Мексико бош прокурори Раул Торрес ва Аризона, Мичиган, Мэриленд, Миннесота, Калифорния, Невада, Вермонт, Коннектикут, Род-Айленд, Массачусетс, Орегон, Вашингтон ва Гавайи расмийлари томонидан берилган.

Хабарга кўра, Нью-Мексико бошчилигидаги штатлар Маскка “мисли кўрилмаган” ваколатлар берилганидан норози.

“Бу унга федерал агентликларни тарқатиб юбориш ва қонунчилик рухсатисиз бюджетларни қисқартириш имконини беради”, дейилади аризада.

Қайд этилишича, судга, шунингдек, АҚШ Халқаро Тараққиёт Агентлигининг (USAID) 26 нафар ходими ва пудратчилари DOGE ваколатларини чеклашни сўраб мурожаат қилган.

Нашрга кўра, бир қанча агентликлар маъмурлари DOGE’нинг махфий маълумотларга киришини аллақачон чеклаб қўйган ва суд агентликка USAID’нинг 2000 дан ортиқ ходимларини ишдан бўшатишни вақтинча тақиқлаган. Даъвогарлар Маскнинг барча қарорларини ноқонуний деб эълон қилишни ва Сенат томонидан тасдиқланмагунча, унинг DOGE’даги фаолиятини тўхтатиб қўйишни талаб қилмоқда.

Трамп маъмурияти Маск қонун доирасида ҳаракат қилаётганини ва DOGE ҳукумат харажатларини қисқартириш ва коррупцияга қарши курашиш устида ишлаётганини айтади.

Эслатиб ўтамиз, аввалроқ АҚШ федерал суди Президент Дональд Трамп маъмуриятини музлатилган хорижий ёрдамни тиклашга мажбурлаганди.