АҚШни эмас, Данияни танлаймиз – Гренландия (видео)
Олам
−
13 Январь 5134 1 дақиқа
Гренландия АҚШ билан яқинлашув эҳтимоллари муҳокама қилинаётган бир пайтда, орол ҳукумати ўз танловини Дания фойдасига қилганини очиқ эълон қилди. Бу ҳақда орол Бош вазири Йенс-Фредерик Нильсен Копенгагенда ўтказилган матбуот анжуманида айтиб ўтди.
“Гренландия АҚШга тегишли бўлмайди. Агар биз шу ерда ва ҳозир АҚШ билан Дания ўртасида танлов қилишга мажбур бўлсак, биз Данияни танлаймиз. Биз НАТОни танлаймиз. Биз Дания Қироллигини танлаймиз. Биз Европа Иттифоқини танлаймиз”, деган Нильсен.
Ушбу матбуот анжуманида Дания Бош вазири Метте Фредериксен ҳам сўзга чиқиб, ҳудуд ҳеч кимга сотилмаслигини яна бир бор таъкидлаган.
“Бизнинг хабаримиз аниқ: Гренландия сотилмайди. Биз бу ҳақда бошидан эълон қилганмиз, шунингдек, америкаликларга ҳам бошидан айтганмиз: агар хавфсизлик масаласи бўлса, бирга қиладиган ва қилиниши керак бўлган кўп нарсалар бор. Биз бу фикрни эртанги учрашувда яна такрорлаймиз”, дейди у.
Эслатиб ўтамиз, аввалроқ АҚШ Президенти Дональд Трампнинг Гренландия бўйича махсус элчиси Жефф Лэндри Данияни дунёдаги энг катта оролни босиб олганликда айблаганди.
Live
Барчаси