АҚШ ҳаракатлари Трамп имзосининг қийматсиз эканини кўрсатди – Мужтабо Хоманаий

Эрон олий раҳбари Мужтабо Хоманаий АҚШ Эрон ва Америка Президентлари ўртасида имзоланган англашув меморандумини бир неча бор бузганини танқид қилиб, бу ҳолат АҚШ Президенти Дональд Трампнинг имзоси “бутунлай қадрсиз ва ишончсиз” эканини кўрсатганини билдирди. Бу ҳақда олий раҳбар X ижтимоий тармоғида ёзган.

Ёзма баёнот билан чиққан Хоманаийнинг таъкидлашича, Вашингтон ўз мажбуриятларига амал қилмаган. Хоманаий, шунингдек, АҚШ “Эрон халқи ва қаршилик фронти унга унутилмас сабоқлар бера олишини билиши керак”лигини таъкидлаган.

Унинг баёноти АҚШ ва Эрон ўртасидаги ўт очишни тўхтатиш келишуви ўтган ҳафта барбод бўлганидан кейин икки томоннинг ўзаро зарбалари алмашинуви давом этаётган бир пайтга тўғри келди. Бу вазият кенг кўламли уруш қайта бошланиши мумкинлиги ҳақидаги хавотирларни кучайтирган.

Эслатиб ўтамиз, аввалроқ АҚШ Президенти Дональд Трамп Эрон музокараларга рози бўлмаса, мамлакатнинг электр станциялари ва кўприкларига зарба беришини айтиб Эронга таҳдид қилган эди.