“АҚШ ёки Хитой”. Трамп 70 дан ортиқ давлатга танлаш имкониятини берди

АҚШ Президенти Дональд Трамп Оқ уй томонидан киритилган импорт божларини бекор қилиш эвазига 70 дан ортиқ давлатни Хитой билан ҳамкорликни чеклашга кўндирмоқчи. Бу ҳақда “The Wall Street Journal” хабар берди.

Маълум қилинишича, давлатлар вакиллари билан музокараларда АҚШ маъмурияти мамлакатлардан Хитойга ўз ҳудудлари орқали товарлар етказиб беришни тақиқлашни, Хитой фирмаларини жойлаштиришга йўл қўймасликни, шунингдек, Хитойнинг арзон саноат маҳсулотларини сотиб олмасликни сўрашни режалаштирмоқда. Нашр суҳбатдошларининг сўзларига кўра, аниқ талаблар турли мамлакатлар учун уларнинг Хитой иқтисодиётига жалб этилишига қараб фарқ қилади.

Нашрнинг ёзишича, АҚШ расмийлари баъзи давлатлар билан дастлабки музокараларда бу мавзуни аллақачон кўтарган. Дональд Трампнинг ўзи “Fox News ” телеканалига Панама канали бўйича берган интервьюсида ушбу стратегияга ишора қилган. Ўшанда у мамлакатларни “АҚШ ва Хитойдан бирини танлашга” мажбур қила олишини айтганди.

Қайд этилишича, ушбу стратегиянинг муаллифларидан бири АҚШ Молия вазири Скотт Бессантдир. Шундай қилиб, у Хитой иқтисодиётини заифлаштириш, ўз бизнесини изоляция қилиш ва давлатлар билан савдо қарама-қаршиликларида ён беришга мажбур қилишни кутмоқда.

Эслатиб ўтамиз, аввалроқ Хитой раҳбарияти ўз амалдорларига бошқа мамлакатларни АҚШ Президенти Дональд Трампнинг божларига қарши чиқишга ундаш учун дипломатик кампания ўтказишни буюргани ҳақида хабар берилганди. Ушбу буйруқдан сўнг, Хитой дипломатлари АҚШ божлари таъсир кўрсатган бир қанча давлатларга ҳамкорлик қилиш илтимоси билан хатлар юборган, шунингдек, “АҚШнинг Европадаги, Япония ва Жанубий Кореядаги эски иттифоқчилари” билан алоқалар ўрнатган.