АҚШ ва Украина тинчлик келишуви доирасидаги музокараларни тугатди

Кеча, 23 ноябрь куни Швейцариянинг Женева шаҳрида Украина ва АҚШ делегациялари ўртасидаги музокаралар якунланди. Бу ҳақда Оқ уй хабар берди.

Маълум қилинишича, музокаралар натижасида томонлар “янгиланган ва такомиллаштирилган тинчликка эришиш бўйича асосий келишув” ишлаб чиққан.

АҚШ томонидан музокараларда Давлат котиби Марко Рубио, Президентнинг махсус вакили Стив Уиткофф, АҚШ армияси вазири Дэниэль Дрисколл ва Президент Дональд Трампнинг куёви Жаред Кушнер иштирок этган.

Таъкидланишича, музокаралар конструктив, мақсадга йўналтирилган ва ўзаро ҳурматга асосланган тарзда ўтган. Бу икки томоннинг адолатли ва барқарор тинчликка эришиш борасидаги умумий интилишини кўрсатган. Шунингдек, Вашингтон ва Киевнинг фикрича, келажакдаги ҳар қандай битим Украина суверенитетини қўллаб-қувватлаши ва “барқарор ҳамда адолатли тинчликни таъминлаши” лозим.

Оқ уйнинг маълумотига кўра, Украина томони учрашувда хавфсизлик кафолатлари, узоқ муддатли иқтисодий ривожланиш, инфратузилмани ҳимоя қилиш, кемалар қатнови эркинлиги ва сиёсий суверенитет каби барча асосий масалалар батафсил кўриб чиқилганини тасдиқлаган. Киев вакиллари ҳар бир йўналишда таклиф ва эътирозлари инобатга олингани учун миннатдорлик билдирган.

Оқ уй баёнотига кўра, Украина томони музокаралар давомида берилган ўзгаришлар ва изоҳлар асосида ҳозирги тинчлик режасининг лойиҳаси Украина миллий манфаатларига мос келишини ҳамда мамлакат хавфсизлигини яқин ва узоқ муддатда таъминлайдиган ишончли механизмлар таклиф этилаётганини айтган.

Уларнинг таъкидлашича, кучайтирилган хавфсизлик кафолатлари, ҳужум қилмаслик бўйича мажбуриятлар, энергетик барқарорлик ва қайта тиклаш чоралари Украина учун энг муҳим стратегик талабларни қондиради.

Украина делегацияси АҚШ ва Трампга можарони тартибга солиш йўлидаги саъй-ҳаракатлари учун миннатдорлик билдирган. Томонлар яқин кунларда қўшма таклифлар устида ишлашни давом эттиришга ҳамда Европа ҳамкорлари билан яқин алоқада бўлишга келишиб олган.

Баёнотда айтилишича, ушбу жараён доирасидаги якуний қарорларни Украина ва АҚШ Президентлари қабул қилади. Ҳар икки томон Украинада хавфсизлик, барқарорлик ва тикланишни таъминлайдиган тинчликка эришиш учун ҳамкорликни давом эттиришга тайёрлигини тасдиқлаган.

Эслатиб ўтамиз, аввалроқ Европа етакчилари АҚШ Президенти Дональд Трампнинг Украина бўйича тинчлик режасининг камида тўрт бандига ўзгартириш киритмоқчи бўлаётгани ҳақида хабар берилганди. Трампнинг режаси жами 28 банддан иборат.