АҚШ ва Эрон тўқнашуви фонида нефть нархи кескин ошди

АҚШ ва Эрон ўртасидаги тўқнашувларнинг кучайиши ортидан жаҳон нефть бозорида нархлар июль ойидагига нисбатан энг юқори ҳафталик ўсишни қайд этди. Бу ҳақда “Reuters” хабар берди.

Нашрнинг ёзишича, бугун, 4 сентябрь куни Brent нефти фьючерслари 54 центга ёки 0,6 фоизга ошиб, 96,06 долларни ташкил қилган. АҚШнинг West Texas Intermediate (WTI) нефти эса 80 центга ёки 0,9 фоизга қимматлаб, 92,10 долларга етган.

Ҳафталик ҳисобда Brent нархи 7,6 фоизга, WTI эса 10,4 фоизга ошган. Бу 20 июлда якунланган ҳафтадан бери қайд этилган энг юқори ҳафталик ўсиш ҳисобланади.

Нефть нархининг кўтарилишига Яқин Шарқдаги вазиятнинг кескинлашуви ва минтақадан нефть етказиб бериш хавфи кучайгани сабаб бўлмоқда.

Маълумотларга кўра, АҚШнинг шу ҳафта Эронга берган зарбалари оқибатида ўнлаб одам, жумладан, тинч аҳоли вакиллари ҳалок бўлган ва яраланган. Бу икки давлат ўртасидаги июль ойидан бери юз берган энг шиддатли тўқнашув бўлган.

Шу билан бирга, Исроил мудофаа вазири Исраэль Кац Исроил Эроннинг ҳарбий ва фуқаролик инфратузилмасини, жумладан, энергетика объектларини “фалаж қилиши” мумкинлиги ҳақидаги огоҳлантиришини яна бир бор такрорлаган.

ANZ таҳлилчилари эса Brent нефтининг қисқа муддатли нарх прогнозини бир баррель учун 95 долларгача оширган. Уларнинг фикрича, Яқин Шарқдаги можаро янада кучайса, нархлар бундан ҳам юқорилаши мумкин.

“Бозор нозик мослашув босқичига кирмоқда. Товар захираларининг кўпайиши дастлабки таъминот инқирозини енгишга ёрдам берди, бироқ эндиликда буферлар камайиб бораётгани сабабли бозор мувозанатини сақлаш қийинлашмоқда”, дея таъкидлаган таҳлилчилар.

АҚШ вице-президенти Ж.Д. Вэнс кеча, 3 сентябрь куни, агар Теҳрон Ҳормуз бўғозидаги тижорат кемаларига ҳужум қилишни тўхтатмаса, Вашингтон Эрон билан музокара олиб боришни режалаштирмаётганини билдирган.
Эрон эса ўз талабларига жавоб бермайдиган деб ҳисоблаган кемалар рўйхатини кенгайтирган.

Бундай кемалар Ҳормуз бўғозидан ўтишга уринган тақдирда жаримага тортилиши, мусодара қилиниши ёки ҳибсга олиниши мумкин.

Шу билан бирга, Ироқ август ойида нефть экспортини июль ойидаги кунига қарийб 1,35 миллион баррелдан 2,34 миллион баррелгача оширган. Сентябрь ойида ҳам экспорт ҳажмининг ошиши кутилмоқда. Бунга катта чегирмалар ҳамда Ироқ танкерларининг Ҳормуз бўғозидан ўтишига Эрон томонидан рухсат берилаётгани сабаб бўлмоқда.

Қайд этилишича, Россия Президенти Владимир Путин эса Украинадаги урушни тугатиш бўйича келишувга эришиш имконияти ҳали ҳам мавжудлигини билдирган. У АҚШ ва Хитой ҳам тинчлик ўрнатилишини қўллаб-қувватлашга тайёр эканини айтган.

Эслатиб ўтамиз, аввалроқ АҚШ ва Эрон ўртасидаги ҳарбий кескинлик пасайгани ортидан жаҳон бозорида нефть нархлари тушишни бошлаган эди.