АҚШ Украинанинг қишлоқ хўжалиги учун 250 миллион доллар ажратди

Америка Қўшма Штатлари Украина қишлоқ хўжалигини қўллаб-қувватлаш учун қўшимча 250 миллион доллар ажратди. Қарор қишлоқ хўжалиги барқарорлиги ташаббуси - Украина (AGRI-Ukraine) доирасида қабул қилинди. Бу орқали АҚШ ҳукуматининг дастурга киритган жами сармояси 350 миллион долларга етди. Бу ҳақда АҚШ Халқаро тараққиёт агентлиги (USAID) хабар берди. 

USAID’нинг баёноти Россия дон йўлаги келишувини тўхтатилиши фонида янграган.

“Қўшимча 250 миллион доллар билан USAID ирригация, ғалла элеваторлари, юк ташиш иншоотлари, порт ва чегара каби муҳим қишлоқ хўжалиги инфратузилмасини кенгайтиришга ёрдам бермоқда. Шунингдек, USAID кичик ва ўрта қишлоқ хўжалиги корхоналарига 2023 йилга мўлжалланган экиш ва йиғим-терим режаларини бажариш учун зарур бўлган молиялаштириш ва қишлоқ хўжалиги ресурсларидан фойдаланиш имкониятини таъминлаш бўйича кўмагини кенгайтиради”, дейилади агентлик баёнотида.

Маълумот учун, AGRI-Ukraine лойиҳаси дон келишуви билан деярли бир вақтда, яъни 2022 йилнинг июль ойида ишга туширилган. Қўшма Штатлар мазкур лойиҳа доирасида Украинанинг қишлоқ хўжалиги маҳсулотларини ишлаб чиқариш ва экспортини кўпайтиришни мақсад қилган. AGRI-Ukraine'нинг биринчи йилида USAID 100 миллион доллар ҳисса қўшган бўлса, донорлар, хусусий сектор ва фондлар томонидан мазкур лойиҳа учун қўшимча 250 миллион доллар маблағ ажратилган.

Эслатиб ўтамиз, Россия томони 18 июлдан бошлаб дон йўлаги келишуви тўхтатилишини маълум қилганди. Бу Бирлашган Миллатлар Ташкилоти Бош котиби Антониу Гутерриш, АҚШ Давлат котиби Энтони Блинкен ва Европа комиссияси раҳбари Урсула фон дер Ляйен Москванинг бу қарорини қоралади. Украина Президенти Владимир Зеленский эса Туркия Президенти Ражаб Тойиб Эрдўған ва БМТ Бош котиби Антониу Гутерришга дон йўлаги келишувини ёки унга ўхшаш лойиҳани уч томонлама шаклда давом эттириш таклифи билан расмий мактуб юборди. Украина Ташқи ишлар вазири Дмитрий Кулеба БМТ Хавфсизлик кенгаши йиғилишида дунёнинг барча мамлакатларига мурожаат қилиб, Россия Федерациясини “дон келишуви”га қайтишга мажбурлаш ва очлик ўйинларини тўхтатишга чақирди.