АҚШ Украинага қанча Tomahawk ракеталарини етказиб бера олиши айтилди

Қўшма Штатлар Украинага 20 дан 50 тагача қанотли Tomahawk ракеталарини тақдим этиши мумкин. Бу ҳақда “Financial Times” хабар берди.

Америка хавфсизлиги маркази мудофаа бўйича директори Стейси Петтижоннинг фикрича, “бу уруш динамикасини тубдан ўзгартира олмайди”.

АҚШнинг Tomahawk ракеталарининг аниқ сони номаълум. Пентагоннинг собиқ расмийси, ҳозирда Стратегик ва халқаро тадқиқотлар марказида ишловчи Марк Кансианнинг ҳисоб-китобларига кўра, уларнинг сони 4150 га яқин бўлиши мумкин. Айни пайтда, 2022 йилдан бери буюртма қилинган 200 та Tomahawk’нинг 120 таси аллақачон жангларда қўлланган. 2026 йилги бюджетда Пентагон қўшимча 57 та таси учун маблағ сўради.

“Вашингтонга Венесуэлага зарбалар бериш учун Томаҳавк ракеталари керак бўлиши мумкин”, деб ёзади FT.

Потенциал Tomahawk етказиб бериш АҚШ Президенти Дональд Трамп ва Украина етакчиси Владимир Зеленский ўртасидаги 17 октябрь куни Вашингтонда бўлиб ўтиши режалаштирилган учрашувда муҳокама қилинадиган мавзулардан бири бўлади. Улар аллақачон НАТО иттифоқчиларининг Украина учун бундай ракеталарни сотиб олиш имкониятларини муҳокама қилган. Мақолада таъкидланишича, Tomahawk 2022 йилдаги жанговар ҳаракатлар бошланганидан бери “Украинанинг қуроллар рўйхатида биринчи ўринда” турган.

Трамп Украинага Tomahawk’ларни сотиш имкониятини кўриб чиқаётганини айтди, бироқ у Киев бундай қуроллардан қандай фойдаланишни режалаштираётгани ҳақида кўпроқ маълумот олмоқчи эканини таъкидлади. Америка Президенти бу масалани Россия етакчиси Владимир Путин билан ҳам муҳокама қилиши мумкинлигини айтди. Трамп Tomahawk’нинг потенциал сотилишини эскалация деб атади.

Россия Ғарбнинг Киевга қурол сотишини қоралади. Президент Владимир Путиннинг таъкидлашича, Tomahawk’нинг эҳтимолий етказиб берилишига Москванинг жавоби Россия ҳаво ҳужумидан мудофаа тизимини кучайтириш бўлади. Россия Хавфсизлик кенгаши раиси ўринбосари Дмитрий Медведев ракеталарни Киевга топшириш бутун дунё, жумладан, Дональд Трамп учун хавфли оқибатларга олиб келиши мумкинлигини таъкидлади.

Эслатиб ўтамиз, аввалроқ АҚШ Президенти Дональд Трамп Украинага Tomahawk туридаги қанотли ракеталарни бериш имкониятини тилга олганди. Унинг айтишича, агар Россия Украинага қарши агрессив урушни тинч йўл билан тугатишдан бош тортса, Вашингтон шундай қадамга бориши мумкин.