АҚШ Украина учун қуролларни НАТОга сотмоқчи 

Америка Қўшма Штатлари НАТОга қурол сотади, кейин эса альянс уни Украинага етказиб беради. Бу ҳақда кеча, 10 июль куни АҚШ Президенти Дональд Трамп Американинг NBC телеканалига берган интервьюсида маълум қилди.

Телеканал Президент билан бўлган суҳбатнинг тўлиқ ёзувини эълон қилмаган, бироқ унинг бир қатор иқтибосларини эълон қилган.

“Биз НАТОга қурол жўнатамиз ва НАТО бу қуроллар учун 100% тўлайди. Шундай қилиб, биз юборган қуроллар НАТОга кетади, кейин эса НАТО бу қуролларни Украинага етказиб беради, НАТО эса бу қуроллар учун тўлайди”, деган Трамп.

NBC телеканали хабарига кўра, Трамп буни АҚШ, НАТО ва Украина ўртасида Америка қуролларини етказиб бериш бўйича янги келишув деб атади. Унинг айтишича, бу ҳақда Шимолий Атлантика альянсининг июнь ойида бўлиб ўтган саммитида келишувга эришилган.

“Биз НАТОни қурол билан таъминлаяпмиз ва НАТО бу қуролларнинг тўлиқ нархини тўлайди. Биз Patriot тизимларини НАТОга юборишни режалаштирмоқдамиз, кейин эса НАТО уларни тарқатади. Россиядан ҳафсалам пир бўлди, аммо кейинги бир неча ҳафта ичида нима бўлишини кўрамиз”, деб такрорлади Трамп.

У 14 июль куни “Россия бўйича асосий баёнот” билан чиқишга ваъда берди.

НАТО ёки альянс вакиллари Дональд Трампнинг янги келишув ҳақидаги сўзларига ҳозирча изоҳ бермади. НАТО Бош котиби Марк Рютте кеча, 10 июль куни Х ижтимоий тармоғида Трамп билан гаплашгани ва “раҳбарларни Украина кўпроқ ўқ-дорилар ва ҳаво ҳужумидан мудофаа тизимларига эга бўлиши учун олдинга боришга чақирганини” ёзди.

Германия канцлери Фридрих Мерц ҳам кеча, 10 июль куни Берлин АҚШдан Patriot тизимларини сотиб олишга ва уларни Украинага беришга тайёрлигини айтди. Мерц, шунингдек, бу ҳақда Трамп билан аллақачон гаплашганини таъкидлади.